MNF-in martar ruhro an phawrh belh

MNF party chuan Mizo hnam tana martarte zinga pahnih ruhro an phawrh belh leh a, nimin khan Aizawlah lain, Mizo Hnam Runah an pualin inkhawm an buatsaih.

MNF thuchhuah tarlan danin, Mizo hnam tana martar pahnih ruhro an pawrh belhte hi Sgt. Lalrinthanga, Maubawk leh Cpl. Lalnunmawia, Mission Vengthlang te an ni a; an pahnih hian Zampuimanga battalion-a mi ve ve niin, October 31, 1968-ah Lunghret-a an awm laiin India sipaiin an kap hlum a ni.

Mi pahnihte hi Lunghretah phûm an ni a, Ex-MNA Association vice president C Zama hoa Lengpui leh Rawpuichhip khuaa Ex-MNA leh YMA member-te'n a thlan laiin, ruhro hi an phawrh a ni.

MNF party chuan, Lalrinthanga leh Lalnunmawia te ruhro chu a hma lama an lo lak chhuah tawhte nen June 16, 2017 khian Martar Thlanmual, Luangmualah an dahṭha dawn tih an tarlang.