Organic farming zirhona ṭan

Assam Agriculture University hnuaia Jorhat Extension Education Institute (EEI) leh Mizoram sorkara Agricultural Management & Extension Training Institute (SAMETI)-te chuan, nimin khan ni li awh tur, Agriculture directorate committee room-ah 'Off campus training on organic farming and Integrated Nutrient Management' an buatsaih ṭan.

Training hi Agriculture (Crop Husbandry) director J Lalzamliana'n a hawng a; J Lalzamliana chuan, an department hnuaia hmalakna reng reng chu a hralh chhuahna tur rîruang ngaihtuah lâwka kalpui vek a ṭul tih sawiin, training-a telte chu kut hnathawktute hnena pek chhawn tur thiamna zir chhuah tum turin a chah.

Training-ah hian EEI-a professor Dr AK Bhattacharya leh Assam Agriculture University-a soil micro-biologist Dr R Baruah ten thil pawimawhte an zirtir dawn a ni.