Sum dinhmun a ziaawm chho zel dawn ; SEDP kan kalpui zel dawn - Lalchamliana

Taxation minister Lalchamliana chuan, Mizoram sum dinhmun a ziaawm chho zel dawn nia sawiin, "SEDP pawh kan kalpui zel dawn," a ti a; Covid-19 avangin sorkar laipui aṭanga sum hmuh a tlakhniam avangin sum harsatna a awm lo thei lo niin a sawi.

Lalchamliana hian MNF Aizawl South-II Block-in nimina Kulikawn YMA Hall-a leadership training leh mi thar lawm inkhawm an buatsaihah thu sawiin, Mizoram sum dinhmun a ziaawm chhoh dawn thu Finance hotute'n an hrilh tih a sawi a, "SEDP pawh kan kalpui zel dawn. Chhungkaw 60,000 thlan chhuah aṭangin chhungkaw 30,000 hnenah Rs 50,000 pek phawt tur a ni," a ti.

Lalchamliana chuan, India rama chhiah tling khawm insem (share in taxes)-ah Mizoramin 0.56% chauh a chan ve thu sawiin, "Thla khatah cheng vbc. 230 vel a ni a, Covid laiin cheng vbc. 180 vel min pe. April 2020 aṭanga kum 2022 inkar, thla 20 vel chhunga kan hmuh tur kan hmuh loh chu vbc 2,600 zet a ni. Sum harsatna a awm lo thei lo," a ti. MNF president leh chief minister Zoramthanga an bei ṭhin chu politics kalphung pangngai a nih thu sawiin chî-âi lo turin MNF mite a chah.

Lalchamliana sawi danin, NABARD, LIC leh market borrowing-te chu loan-a Mizoram sorkarin sum a hmuhna hnar a ni a, state thawh chhuah a pun loh chuan pûk loin kal theih a ni lo. External aided project (EAP) aṭangin sum pûk theih a ni bawk a, ADB loan cheng vbc. 1,000 pûk tum pawh sorkar laipuiin 90% a tum dawn a ni.

Sum hmuhna hlawm lian revenue (deficit) gap grant, sum indaih lohna Finance Commission (FC) aṭangin a lo kal ṭhin a, FC 14-na (kum 2016-2020) chhungin cheng vbc. 21,183 hmuh a nih laiin, FC 15-na (kum 2021-2025) atan Mizoram chan tur vbc. 6,544 chauh dah a ni. Lalchamliana chuan, "FC aṭanga sum hmuh a tlahniam tial tial a, hetiang karah hian tuin nge financial management thiam bik ang le?" a ti.

Lalchamliana chuan, RBI account luahlum tura Mizoram sorkarin vbc 500-600 vel a dah ṭhin chu a neitu turte hnenah pek chhuah a ṭul ta tih sawiin, "Tun hma pawhin kan nawmsak loh tehlul nen, tunah hian kan nuamsa lo zual a ni," a ti a; CSS sum chu RBI-a Mizoram account luahlum tura dah ṭhin a nih thu a sawi.

Taxation Minister chuan, "CSS, MR/provisional employee, adt. tel loin sorkar hnathawk hlawh atan thla tin cheng vbc. 400 vel pek chhuah a ngai. Congress sorkar khan sixth pay aṭangin seventh pay an kalpui avangin hlawh atan senso a pun phah hle a ni," a ti bawk.

MNF vice president Vanlalzawma pawhin thu sawiin, inzir zel a pawimawh thu leh social media hmang thiam tura ṭan lâk a ṭul thu a sawi a; MNF chu kum 60 a tling tawh tih sawiin, "Leader pahnih nghet tak Pu Laldenga leh Pu Zoramthanga chauh kan la nei a, hei hi kan ngêlnghehzia tilangtu a ni," a ti.

MNF thuchhuah chuan, nimina inkhawm­ah hian MNF party-ah voter 590 an lawm lut niin a tarlang.