YMA-in kawng siamṭha turin an hriattir ; Mi pahnih zángnadawmna pek an phût

YMA, Khawthlangtuipui Group chuan Lunglei leh Tlabung inkar kawngpui chhe zual laite chu July 28-29, 2022 chhunga thawm ṭha ngei turin National Highways Infra­struc­ture and Development Corporation Limited (NHIDCL) leh an hnuaia contractor-te an hriattir. Kawng chhia vanga chêtsualnaa thi mi pahnih hnenah zángnadawmna pe turin NHIDCL an phût bawk.

Khawthlangtuipui Group YMA hruaitute nimina Tlabunga ṭhukhawm chuan thuchhuah an siam a, "July 28-29, 2022, ni hnih chhung hian Lunglei-Tlabung NH-302 kawng laih mek hi a laitu NHIDCL leh a hnuaia thawkte'n a chhe lai siam­ṭhat hna an thawk lo a nih chuan an bungrua leh an chungah eng pawh thleng se YMA, Khawthlangtuipui Group chuan mawh a phur lo ang," an ti.

NH-302 kawng laihnaa leivûng paihna mumal loh vanga lui tuiin a tawrh chungchangah YMA chuan, dan dik taka leivung paih turin kawng laitute an hriattir a; "Kawng chhiat avanga nunna chán ta Pu Lalmalsawma (driver), Lunglei Ramthar leh Pu R Lalthantluanga, Chhipphir khuate pawh NHIDCL hian zangnadawmna pe ngei rawh se," an ti bawk.

Khawthlangtuipui Group YMA hian Tlabunga truck/pick-up neitute leh maxicab welfare-te nen ṭangrualin naktuk Inrinni hian hnatlangpui an ko a, ngai pawimawh turin YMA member-te an chah a ni.

Tlabung Post aṭanga thu dawn danin, Lalmalsawma hian truck-in Lungsena dah tur buhfai a phur a, Chauchi lei pelha kawng nâlah truck a thunun theih loh avangin kawng thlangah a lum a, chetsualna hmunah a thi a ni.

July 27, Nilaini khan Tlabunga zin R Lalthantluanga (71), Chhipphir chu zing dar 8:45 velah Tuichawng aṭanga km. 3 vela hláah kawng chhiaa an chuanna lirthei táng nam tuma a chhuk chu chesualin, kawng thlang ft. 20 vela sángah a tla a, Tlabung damdawi-in panpui ni mah se, a hliam tuar loin a thi a ni.

Tlabung leh Lunglei inkar NH-302 hi tunlaiin a chhe zual hle a, ni tin deuhthaw lirthei eng emaw zat a tàng ṭhin a, Tlabung leh Lunglei inkar, km. 90 velah darkar 10 chuang thangte a ngai ṭhin tih Tlabung aṭanga thu dawnna chuan a tarlang.