Lok Sabha MP-in BRO hotu a kâwm

Lok Sabha MP C Lalrosanga chuan nimin khan New Delhi-a Border Roads Organisation (BRO) hmunpuiah BRO director general Lt.Gen. Rajeev Choudhary a kâwm a, Mizoram ramri hnaiha kawng sial leh siamṭhat hna thawh chungchang a sawipui.

C Lalrosanga chuan, Kawnpui - Durtlang - Aizawl kawngpuia km. 10.25-a thui, Durtlang Leitan leh Sihphir inkar kawng zauh leh siamṭhatna hna Mizoram PWD kuta hlan tur chu tifel thuai turin a ngen a; BRO Director General chuan PWD kutah hlan thuai tum a nih thu a lo hrilh.

Lt.Gen. Rajeev Choudhary chuan, Hnahthial-Sangau inkara Chhimtuipui lui chunga lei dawhna tur ruahman mek a nih thu leh, lei panna kawng km. 1-a thui siam hna nen lei dawhna leh a kaihhnawih atan cheng vbc. 75 ruahman a nih thu a sawi a; Mizoram sorkar aṭanga ram leh ramngaw hman phalna dawn a nih veleh sorkar laipuiah sum mamawhte an nawr zui dawn thu a sawi bawk.

MP C Lalrosanga chuan, Myan­mar leh Bangladesh ramri hrúl leh ramri pawhna kawngte sial leh siamṭhat a ṭul thu a sawi a; BRO hotu chuan Ministry of Defence hotute hnenah thlen hmasa turin a lo chah a ni.