KHAWTHLIR

Thisen pe
Govt Aizawl College NSS chuan nimin khan Sikulpuikawna an college-ah thisen pek an huaihawt a, Civil Hospital, Aizawl tan thisen unit 165 an pe a, petute mipa 124 leh hmeichhia 41 an ni. GAC hian July 26, Thawhlehni khan thisen unit 182 an pe tawh bawk a, ni hnih chhunga thisen an pek zat chu unit 347 a ni.

Nagaland-ah tel
Konyak Baptist Church-a Clean Election Movement Committee chuan nimin khan Nagaland-a Mon khuaah ‘Workshop on Clean Election Movement’ an buatsaih a, Central YMA assistant secretary Prof. Malsawmliana, MPF secretary ni bawk leh CEC member RS Lalrinsanga te an tel. Prof. Malsawmliana hian Mizorama inthlanna thianghlim a awm theihna tura Mizoram People Forum hmalakna a sawi a, RS Lalrinsanga'n pawl hrang hrangte hmalakna a sawi bawk.

Intlân chhâwk
Phunchawnga Baptist kohhran biak-in bula kawng chhakah lei min mai theia ngaih a awm avangin naktuk July 30 hian chawhma dar 10 aṭangin thenfai hna thawh a ni dawn a; hei vang hian kawngpuiah lirthei intlan chhâwk a ṭul dawn tih Traffic SP Rodingliana Chawngthu chuan a tarlang. Lirthei tê tan Sakawrtuichhun-Lungverh kawngah kal theih a ni bawk ang.

Minister-in hawng
Mizoram Table Tennis Association (MTTA) chief patron TJ Lalnuntluanga, minister of state chuan nimin khan MTT Hall, Mission Vengah MTTA Season Opening Championship, 2022 a hawng.

Zirlaite intiam
Mizoram sorkara Social Defence & Rehabilitation Board, Social Welfare & Tribal Affairs department leh sorkar laipuia National Institute of Social Defence-te chuan nimin khan Helen Lowry College-ah 'Awareness programme on drug abuse prevention' an buatsaih a, college zirlai 150 vel leh zirtirtute an tel. Ruihhlo ṭhat lohzia an inzirtir bakah, zirlaite'n ruihhlo ti chhin lo turin thu an tiam a ni.