Taima leh thlai thar tam apiangin Budget an sâwk tam dawn - Duhoma

ZPM leader Lalduhoma chuan nimin khan Tualte leh Hmuncheng khuaa vantlang inkhawmah thu sawiin, party sorkar ni lo, mipui sorkar siam an tum a, taima leh thar tam apiangin budget an sâwk tam dawn tih a sawi.

Lalduhoma chuan, "Party sorkar ni lo, mipui sorkar kan din dawn avangin taima leh thar chhuak hnem apiangin budget an sâwk hnem mai dawn. Kut hnathawh hi tihtawp kan tum lo a, kan uar sauh sauh zawk dawn. Kum tina lo neih kan sawn ṭhin erawh chu zâwi zâwiin tihtawp kan tum a, thiamna changkang zawk, kháwl leh thil dang hmangin thlai hmun nghet din kan tum," a ti.

Mizoram dinhmun thlirin, ramin bung thar a kai dawn nia an hriat thu sawiin Duhoma chuan, "Kan rama rorel tawh party pahnihte kan thlirin kalphung thar kan mamawh tawh a ni tih hi mipui ngaihdan a ni. Party pahnihte hi an ṭha lo kan ti lo a, an theih tawkin hna an thawk," a ti a; an hruaitu lu berte'n ram leh hnam aia party leh mimal hamṭhatna an ngaih pawimawh zawk avangin ramin a nih tur ang a ni thei lo niin a sawi.

Lalduhoma chuan, ZPM-in mithiamte nen ngun takin an zir a, a bul aṭanga a tàwp thleng, thlai chìn aṭanga a hralhna tur hre sa vekin thlai an chìntir dawn tih sawiin, "Congress leh MNF sorkar chhung pawhin thlai chi hrang hrang kan chíng tawh ṭhin, amaherawhchu, market mumal a awm loh avangin mirethei kan insiam belh nasa em em a ni," a ti.

ZPM Leader chuan, chhungkaw tinin thiam zawng leh tuina an nei a, bul ṭanna an neih loh avangin eizawnna ngêlnghet din an harsat ṭhin tih sawiin, "A bik takin ṭhalai zingah enterpreneurship lamah hma kan sawn nasa a, ṭhalai taima leh thiamna nei sang bawk si hi kan ngai pawimawh em em a ni," a ti a; mi taima leh remhriate kum nga chhunga chàwi kan an tum thu a sawi a ni.