Minister-in MBSE online portal a hawng

School Education minister Lalchhandama Ralte chuan nimin khan Mizoram Board of School Education (MBSE) pisa conference hall-ah MBSE online portal (mbseonline.com) a hawng.

MBSE online portal-ah hian high school 767 leh higher secondary school 214 an inziak lut tawh. Sikul hming, awmna hmun, sikul code, centre code, district awmna, sorkar pawmpui (affiliate) a nih leh nih loh, exam centre a nih leh nih loh, an exam centre awmna, Directorate of School Education aṭanga permission a neih leh neih lohte tarlan a ni tawh a; fee hrang hrang pek theihna turin ruahman mek a ni bawk.

Lalchhandama Ralte chuan, Mizoram zirna hmasawnna tur leh zirnaa ṭangkai zawk leh ram mipui tana hna an thawh theihna turin online portal hawn a nih thu a sawi a, "Zirna ṭha zawk, hmansawnna rahbi NEP 2020 kaltlangin chhawp chhuah mek a ni. Mi ṭhenkhatin MBSE syllabus upgrade a ṭul lo maw, tia sawite an awm ṭhin a, Mizoram zirna syllabus hi India ram danga awm CBSE-te nen a inang a ni," a ti.

National Education Policy 2020 kaltlangin India ram leh khawvel huapah pawh Mizorama zirna tur chu level sang zawk a nih thu sawiin Minister chuan, "Zirtirnaah leh exam zawhna kalphung her rem chungchangah uluk tak leh tunlai khawvel mila her rem zel a ni a, scheme of examination tihdanglam te, textbook knowledge neih nan te, a hun taka zirlaite'n an pianpui finna an hman theihna tura exam zawhna siamte kalpui zel a ni," a ti a; thawktute chu mipui tana ṭha zawka thawk tura an inbuatsaih a ṭul thu a sawi.

MBSE portal kaltlang hian MBSE pisaa kal kher ngai loin sikul tinin online hmangin students registration an ti thei tawh dawn a; zirlai dinhmun, thlalak leh signature thlengin upload theih a ni. Registration fee pawh online-in pek theih tura ruahman a ni a, payment gateway atan PayTM nen inremna ziah tawh a ni.