School Education depart-ah thawktu 2,500 chuang lâk a ni tawh - Lalchhandama

Mizoram Education Inspecting Officers' Association (MEIOA) chuan nimin khan Tourist Lodge, Aizawlah General Conference an hmang a, School Education minister Lalchhandama Ralte-in a hmanpui. Minister chuan, School Education department-ah thawktu 2,500 chuang lâk a nih tawh thu a sawi.

Lalchhandama Ralte chuan, sorkarin zirna ngaih pawimawh hmasakah a nei nia sawiin, "Department dang tana thîk tham khawpin sorkarin a ngai pawimawh a, thawktu lâkte pawh 2,500 chuang an ni tawh. IV grade ringawt pawh 50 chuang lak an ni tawh," a ti a; sikul leh sikul ramte humhalh a ngaih thu leh thawktute'n an hna chu missionary thinlung pûa an thawh a ṭul thu a sawi a ni.

Education department siamṭhat a ngai tih sawiin Lalchhandama Ralte chuan, "Zirna ṭha, quality education a awm theih nan sikulte grading pek a, chumi mil chuan private institution-ah pawh fee bituk a ṭul," a ti a; syllabus hman mek chu state dang nena khaikhinin hniam lo mah se, all India level exam-ah Mizote an la hniam avangin tihchak leh siamṭhat ngai a awm niin a sawi bawk.

MEIOA conference hi Human Resource Development Board vice chairman L Thangmawia, MLA pawhin a hmanpui a; School Education department-a inspecting officer-te an tel a, hruaitu thar an thlang a ni.