Kum 2 chhungin Kolasib dist-ah Naupang kum 5 hnuai lam 58 thi

Nimin khan Kolasib DC conference hall-ah Kolasib District Maternal & Child Health Review Meeting neih a ni a, bawrhsap John LT Sanga'n a kaihruai. Kum 2020-2022 chhungin Kolasib district-ah naupang kum nga hnuai lam 58 thi an awm thu tarlan a ni.

Ṭhutkhawma tarlan danin, kum 2020-21 chhung khan Kolasib district-ah naupang kum 5 hnuai lam 27 an thi a, kum 2021-22 chhungin 31 an thi bawk. Naupang thih chhan tarlan zinga tam ber chu pneumonia leh birth asphyxia/ respiratory failure a ni.

Kum 2021-22 chhunga naupang thi zinga 10 chu chawlhkár khat tling lo an ni a, thla khat leh kum khat inkar mi 12 an thi. Kolasib District Hospital-a thi 19 an awm a, in lama thi pakhat a awm bawk.

Bawrhsap John LT Sanga chuan, naupang thih chhan chu zir chian a, a ṭul anga hma la thuai turin kal khawmte a chah. Ṭhutkhawmnaah hian District Hospital Medical Superintendent, Senior Medical Officer, Primary Health Centre-a medical officer te, DPO leh WHO Surveillance Medical Officer-te an tel a ni.