Chhiatna laka invên dan zirho a ni

Disaster Management & Rehabilitation (DMR) department chuan nimin khan ATI Auditorium-ah sorkar department hrang hranga DMR nodal officer-te tan ni hnih awh tur 'Training on Department Disaster Plan for all Department' an buatsaih ṭan a, DMR minister Lalchamliana'n a hawng.

Lalchamliana chuan, khuarel chhiatna, lir-

nghing, leimin, thlipui leh mihring thlen harsatna - kângmei leh leiminte engtik lai pawha thleng thei a nih thu a sawi a, "Mi tin kan fimkhur a, a theih ang anga kan lo invena hma kan lak lâwk a, inpuahchah a pawimawh. Sorkar department tan pawh chhiatrupna laka invênna te, chhiatna a thlen palha hmalak dan tur lo duan lâwk te, sorkar hmunhma, bungrua, lehkha pawimawh leh thawktute himnaah ngaihtuahna sên a ṭul," a ti.

Chhiatna a thlen thulha inbuatsaihna lama hmalakna leh inpuahchahna ṭhenkhat sawiin Lalchamliana chuan, "Mizoram State Disaster Management Plan leh District Disaster Management Plan-te a ṭul ang zela siamṭhat leh update zel tur," a ti a; sorkarin emergency response vehicle (ERV) district tinah pe vek tura a tihfel tawh thu leh district tinah District Quick Response Team din a nih deuh vek tawh thu a sawi bawk.

Training-ah hian DMR secretary K Lalrinzuali'n a kaihruai a, DMR deputy director Dr Lalrokima Chenkualin training-in a tum tlangpui a sawi a ni.