MIMA-in Rs 10 thîr pawm turin Sumdawngte leh mipui an ngen

Mizoram Merchant Association (MIMA) chuan, India ramah cheng 10 thîr (coin) hman theih a nih angin, Mizoramah pawh hmang tur leh harsatna siam lo turin dawrkaite leh mipui an chah.

MIMA chuan nimin khan thuchhuah siamin, "MIMA hruaitute ngenna kal zelah SBI Manager-in hriattirna leh ngenna a siam, Rs 10 thîr hman leh thleng, deposit theih a nih chungchang SBI-in a chhuah angin, sumdawngte mai ni loin, mi tinin Rs 10 thîr hi hmang tawnin, dawng tlang vek ila, tu mahin harsatna insiam lo turin kan ngenin kan inhriattir a ni," an ti.

MIMA hruaitute chuan nimin khan FCSCA minister K Lalrinliana a pisaah an kawm a, tuialhtheia harsatna awm ṭhin chungchang an sawipui.

Harsatna eng emaw a thlen chánga tuialhthei khuahkhirh vat a ni ṭhin chu harsatna tisualtu nia an hriat thu sawiin MIMA hruaitute chuan, "POL control a nih hian a tûk lawkah a awm lo nghal zel a, mipuiin kan tuar ṭhin. Hei hi petrol black-a zuar an tam lutuk vang niin kan ngai," an ti a; black-a petrol zawrh chu phal loh sa ni mah se, thupek chhuah thar leh a, a rem dan anga hma la turin Minister an ngen a ni.