Covid-19 vanga thi mi pakhat awm belh

July 27, Nilaini khan Mizoramah swab sample 830 endik aṭangin Covid-19 vei mi 145 hmuh chhuah a ni a, positivity rate a tlahniam hret. Nimin khan hripui vei dam tawh mi 151 chhuahtir an ni a, Covid-19 vangin mi pakhat a thi.

Nillainia Covid-19 positive hmuh thar mi 145-te chu mipa 65 leh hmeichhia 80 an ni a, TrueNAT hmanga hmuh chhuah pakhat leh rapid antigen test hmanga hmuh 144 an ni. Positivity rate 17.47% a ni a, a záwnin ni 11 chhung positivity rate 20% chung lam a nih hnuah a tlahniam hret.

Hripui vei enkawl lai Rev. Lawmzuala (87), Lunglawn, Lunglei chu nimin chawhnu dar 2 khan Lunglei DCHC-ah a thi. Lawmzuala hi natna dang vangin July 24, 2022 khan Lunglei DCHC-ah dah luh a ni a, Covid-19 positive a ni tih July 25-ah hmuh chhuah a ni tih sorkar thuchhuakin a tarlang.

Nimin khan Covid-19 vei inenkawl zinga mi 151 chhuahtir an ni a; district tina chhuak zat chu - Aizawlah mi 61, Lungleiah 30, Khawzawlah 21, Champhaiah 10, Serchhipah pariat, Saitual leh Hnahthialah paruk ve ve, Mamitah pali, Lawngtlaiah pathum leh Kolasib-ah pahnih a ni.

IDSP record angin, Mizoramah Covid-19 vei 2,32,225 hmuh chhuah a ni tawh a, mipa 1,08,128 leh hmeichhia 1,24,097 an ni a, mipa aiin hmeichhia 15,969-in an tam zawk. Nimin tlai dar 5 thleng khan mi 2,30,752 (99.37%) chhuahtir an ni tawh a, mi 710 (0.31%) thi tawhin, enkawl mek mi 763 (0.32%) an awm.

Nimin tlai dinhmun angin, Mizorama district 11 zingah Covid-19 positive awm lohna district a awm lo a; enkawl lai tamna ber Aizawl district-ah mi 353 an awm a, Lunglei district-ah mi 158 an awm bawk.