Hmun hrang hranga chhiatna thlengah mi 10 an thi

Tun hnaia ruah sûr vangin nimin khan Mizoram hmun hrang hrangah chhiatna a thleng. He thu ziah laia hriat thin chinah mi 10 an thi a, hliam panga an awm a, in tam tak a chhia a, kawng ping a awm nual bawk.

Tlabung Post chanchinbu editor Vanlalhriat­puia Khiangte hnen aṭanga thu dawn danin, Tlabung Sub-Division chhunga khaw pathum - Marpara South, Changpui leh Phairuangkai khuaahte leiminin in a hnâwl leh tuilianin a lak vangin mi 10 an thi a; mi pathum ruang hmuh tawh a nih laiin, mi dang pasarih ruang chu he thu ziah lai thleng hian hmuh a la ni lo.

Thu dawn danin, Marpara 'S' khuaah hian mi pathum an thi a, Changpui khuaah mi pathum leh Phairuangkai khuaah mi pali an thi bawk. Phairuangkaia thite hriat theih chin chu Dormodon (65), Birobottro (43) leh Roymannekko (50)-te an ni.

Hetih lai hian, Disaster Management & Rehabilitation (DMR) department-in nimin tlai thlenga report an dawn danin, Marpara khuaah hian tui lianin in pahnih a la a, mi pakhat a thi. He thu ziah lai thleng hian mi dang pahnih awmna chin hriat a ni lo.

DMR report ang chuan, Phairuangkai leh Marpara khuaa tuilian leh leiminin in a lak/hnawla thi zat hi hriat chian theih a ni rih lo a; mipuiin an zawn mekte hmuh an nih dan azirin a chiang thei tura ngaih a ni.

Khawthlangtuipui nasa takin a lian a, Tlabung Sub-Division chhungah in 350 vel a chîm. Tlabung Post Editor hnen aṭanga thu dawn danin, Khawthlangtuipui lian hian nimin zing aṭangin Tlabung khaw chhung a chim ṭan a, he thu ziah lai thleng hian Tlabungah in 121 a chîm a, in panga a lên chhia a, mi pakhat a hliam.

Tlabunga tuiin in a chîmte chu mimal in bakah, biak-in, indoor stadium, ICDS centre, waiting shed, V/C House, sa zawrhna in, thingpui dâwr leh Lichéng khèlmualte a ni. Tuilian vanga hmun him lama insaseng chu an vaiin chhungkaw 138 an tling tawh. Tuilian tuar chhungkuate chhawmdàwl nan mi ṭhahnem takin pawisa leh thil dang an thawh khawm nghal a ni.

Tuilian hian Serhuan, Tippereghat, Nunsury-II, Silkur, Tuichawng, Balukiasuri, Lamthai, Mal­suri, Diblibagh leh Kalapani khuaahte chhung­kaw 1,500 chuangin an tuar a; Bolia khuaah in 10 a tichhia a, chhungkaw 20 chu hmun him lamah thiar chhuah an ni.

Khawthlangtuipui lian tuartu khuate hi a tam zawk chu Thorang bial chhung a ni a, Thorang bialtu MLA Zodintluanga, minister chuan a hmuna enfiah turin nimin khan a pan nghal a ni.

Tlawng lui pawh nasa takin a lian a, Sairang khua hmun eng emaw zat a chîm. Sairang khaw mite chuan Tlawng lui lian hi tun hnai kum 20 vel chhunga a len ber ṭum a ni.

Sairangah hian Tlawng lui lianin in 15 a chîm a, chhungkaw 52 chu dinhmun hlauhawma an awm avangin sawn chhuah an ni. Tui lianin in a chîm chhunga bungruate chu khawtlang mipuiin nimin khan an thiar chhuak a, Aizawl leh khaw dang aṭangin mi ṭhahnem takin an pui a ni. Bialtu MLA K Sangṭhuama pawh a hmunah kalin, ṭanpuina remchang ang a pe.

Mizoram chhung hmun eng emaw zatah lei min leh lei chê a awm a, hei vang hian kawngpui eng emaw zat chu lirthei kal tlang theih lohin a ping. Lei min leh chê vang hian in 24 leh lirthei pasarih a chhia bawk. Aizawla leimin thenfai hna chu PWD leh mi tlawmngai dangte'n an thawk a; SIPMIU pawhin hmun hrang hrangah JCB eng emaw zat an thawh bawk.