Hindi zirtirtute 1,000 chuangte rawih Chhunzawm an ni ang - Rajnath Singh

Union Home minister Rajnath Singh leh chief minister Lal Thanhawla chu nimin khan Raj Bhavan-ah an inkâwm a; Rajnath Singh chuan, Mizorama Centrally sponsored scheme (CSS) hnuaia Hindi zirtirtu 1,000 chuangte'n an hna an chhunzawm tur thu a hrilh.

Chief Minister chuan Hindi pawimawhzia sawiin, "Hindi zirtirna leh tihlârna tihchak a ṭul hle. Hemi atan hian Hindi directorate hrang hial kan duh a, sum indaih lohna vangin tih theih a la ni lo. Hetiang a nih laia Hindi zirtirtu 1,000 chuangte tihtawp tum mek hi Hindi ṭhan zelna atana pawi thei a ni," a ti.

Rajnath Singh chuan, Chief Minister-in Hindi a dah pawimawh chu lawmawm a tih thu sawiin, "Hindi Directorate chu kei pawhin ka ngaih pawimawh zawng tak a ni," a ti a; CCS hnuaia Hindi zirtirtu 1,000 rualte chu an hna an chhunzawm tur thu CM a hrilh a ni.

Union Home Minister leh CM Hawla hian Myanmar nena inlaichinna chungchang an sawi dun a; inkungkaihna tihchakna atana hmalakna pawimawh nia an hriatte an sawi dun a ni.

Ruahman ang chuan, Myanmar leh India ramri chungchang sawiho tura rawn kal Union Home Minister leh minister of state for Home Kiren Rijiju-te hi Parva, Lawngtlai district emaw, Zokhawthar emaw tlawh tur an ni a, mahse, khaw awm danin a zir loh avangin an ṭhulh a, nimin khan Mizoram an chhuahsan a ni.