Home Minister-te leh Zoramthanga inkâwm

Mizoram rawn tlawha zin Union Home minister Rajnath Singh chu June 12, Thawhṭanni zan khan Raj Bhavan-ah MNF president Zoramthanga leh treasurer Vanlalzawma ten an kâwm. Nimin zing khan minister of state for Home kiren Rijiju an kawm bawk. Home Minister pahnihte hi Mizoram thil pawimawh hrang hrang an sawipui.

Home minister Rajnath Singh an kawmnaah Zoramthanga chuan, Mizoram a tlawh chuan rah ṭha a chhuah ngei a beisei thu sawiin, Mizoram tlawha Central minister-te an lo kal ṭhin chu hun danga thil thleng ngai lo leh Mizoram tihhmasawnna tura kailâwn pawimawh tak nia a hriat thu a sawi.

Zoramthanga chuan, Myanmar leh Mizoram insumdawn tawnna Zokhawthar Border trade chu tun aia tihchangtlun a ṭul sawiin, Aizawl aṭanga Champhai panna leh Tahan, Myanmar thlenga kawngpui sial mek chu chak zawka hna thawh a nih theih nan hma la turin a ngen.

Kaladan Multi Modal Transit Transport Project (KMMTTP) chungchangah Zoramthanga chuan chak zawka hna thawh a nih theih nana hma la turin Rajnath Singh a ngen a; Bangladesh nena Mizoram insumdawn tawnna Tlabung Border Trade pawh phuisui leh mumal zawka kalpui a nih theih nan sorkar laipuiin nasa zawka kut an thlak a ngaih thu a sawi bawk.

Rajnath Singh pawhin, MNF President ngenna leh thil thlente chu bawhzui nghal a nih tur thu leh, hmalakna kal mekte pawh chak zawka kalpui a nih tur thu a hrilh.

Kiren Rijiju an kawmnaah Zoramthanga chuan India hmarchhak tlang mite chu India ram laili lama an himna tur leh vohbik an nih theihna turin an thlavâng hauhsak ngai a tih thu a hrilh a; Mizote leh hmar-chhak mite chu duhsak theih an nihna laiah duhsak bik an phû tih sawiin, sipai hrang hrangah hmarchhak mite an luh theihna tura ṭanpui theihna lai apianga ṭanpui turin a ngen a ni.