Sorkar laipui hmalakna mipui hrilhfiah

Nimin khan Serchhip, Champhai leh Lungleiah sorkar laipui hmalakna hrang hrangte mipui hrilh hriatna hun, 'Sabka Saath Sabka Vikas Sammelan' buatsaih a ni.

Champhaiah chuan Kahrawt Veng community hall-ah Sabka Sath Sabka Vikas Sammelan hi hman a ni a, Manipur MLA Vunjagin Valte-in a hmanpui a; Champhai khaw chhunga sorkar hnathawk, zirtirtu leh zirlaite, NGO leh mipuite an tel.

Vunjagin Valte chuan, sor-kar laipuiin India ram kawng hrang hranga hma a sawnna tura scheme a duan hrang hrang sawiin, "Scheme-te hian hmarchhak bial tan pawh hmasawnna nasa tak a thlen thei a ni," a ti.

Champhai DC Vanlalngaihsaka pawhin thu sawiin, sorkar laipui scheme Mizorama kalpui mekte a tarlang a, "Heng scheme hrang hrangte hian Mizoram tan kawng hrang hrangin hma-sawnna a thlen a ni," a ti.

Lungleiah chuan Sabka Saath Sabka Vikas Sammelan hi Sai-kuti Hall-ah hman a ni a, khual-lian atana sâwm, Manipur Agri&Vety minister V Hangkhanlian chu khaw awm danin a zir loh avangin a tel thei lo.

Programme buatsaihtu ONGC-a assistant manager MC Das chuan, kum 20 kal ta aṭanga Mizorama an hnathawh dan hrang hrang mipui a hrilh.

Sabka Sath Sabka Vikas hi Serchhipah chuan DC conference hall-ah SDO (Sadar) R Vanrengpuia hoa hman a ni a, department hrang hrangte'n sorkar laipui ṭanpuina hmanga an hnathawhte mipuite an hrilh.

R Vanrengpuia chuan, sorkar laipui-in ram hmasawna atan leh mipuite ṭhatna atana rua-hmanna a siamte an hriat chian loh avang-in an chan tur an chan loh thil tam tak a awm ṭhin tih a sawi a, "Mi dang hrilh chhawng ve thei turin emaw, khawtlang tana ṭangkaina awm thei thilte a nih avangin kan hriat ve ngei hi a ṭul a ni," a ti.