Sorkarin vanduaina tâwkte a tawrhpui ; An tan theihtawp kan chhuah - CM

Chief minister Lal Thanhawla chuan, tun hnaia ruahsûr nasa vanga leimin, tui lian, lei tawlh leh lei chê vanga vanduaina tâwkte chu sorkarin a tawrhpui thu a sawi a, "An tan theihtawp kan chhuah a ni," a ti.

Lal Thanhawla hian nimin khan Secretariat conference hall-ah thuthar thehdarhtute a kâwm a; "Tun hnaia vanduaina thleng hi pawi kan ti a, eng ang chiahin nge kan tawrh tih lakhawm mek a ni a, a chin chiah kan la hre thei lo. Thil thleng hi a rapthlak khawp mai a, eng ang chen nge kan tawrh dawn pawh a hriat loh," tiin, nunna leh in leh lo chánte sorkarin a tawrhpui tak zet tih a sawi.

Sorkarin vanduaina tâwkte tan theihtawp a chhuah tih sawiin Chief Minister chuan, "Inbiakpawhna lamah harsatna a awm. A ṭul ṭul thawk turin inbuatsaih a ni a, mahse, duh angin a chêt zung zung theih dawn loh. Kawng chhia leh thil dangte vangin chet a har dawn a ni," a ti.

Vanglaini palai zawhna chhangin CM Hawla chuan, Mizorama vanduaina thlengte a thuphungin sorkar laipuiah thlen a ni tawh tih a sawi a, "Union Home Minister kha a taka hmutu a ni. Chhiatna kan tawh ve ṭhin hian kan khawtlang nun a ṭhat em avangin kan inpui zung zung a, sorkar laipui aṭanga endiktu an lo kalin in chhiate kan lo sa ṭha leh hman tawh ṭhin," a ti a; tun ṭumah pawh endiktu an lo kal ngei a rin thu a sawi.

Chief Minister sawi danin, Mizo khaw­tlang nun a ṭhat avangin chhiatna a thlenin, state dang angin sorkar laipui aṭangin ṭanpuina dawn tam theih a ni ṭhin lo. Chhiatna thleng zir chiang tur hian Home Minister kaihhruaina hnuaiah High Level Committee din a ni a, minister leh NGO aiawhte member an ni ang.

Tunah hian Chief Secretary kaihhruainain chhiatna thlen dan lak khawm mek a ni a, lak khawm a nih veleh sorkar laipuiah thlen a ni dawn. Mizoram sorkarin sum a ngah loh avangin ṭanpuina atana sum hman turah sorkar laipui kutah thui tak Mizoram sorkar a innghat a, Central-in sum a pek loh chuan tih ngaihna a awm lo.

Nunna chánte chu dan ding lai angin sorkarin mi pakhat zel Rs. 4,00,000-in a rál dawn a, in leh lo chánte chu dan awm sa piah lamah an in chhiat dan leh an in ṭhat dan azirin sorkarin a ṭul angin ṭanpui dan a ngaihtuah dawn a ni.

Lal Thanhawla chuan, Tlabung leh a chhehvela vanduaina tâwkte thlamuan tura a hmuna kal nimin khan a rilrûk thu sawiin, "Weather forecast-in a zir loh em avangin kal theih a ni lo. Naktuk lamah khuain a zir chuan tih theih awm lo mah se, ṭawngka tala thlamuan tura kal ka rilrûk a ni," a ti a; vanduaina tâwkte chu sorkarin theihtawp a chhuah tih hria a, mangang lutuk lo turin a chah.

Chief Minister hi Home minister R Lalzirliana, secretary to CM Lalram Thanga leh DMR secretary K Zothankhuma ten an ṭawiawm a ni.