World Blood Donor Day hman a ni

Nimin khan World Blood Donor Day (WBDD) a ni a, Aizawl leh district hrang hrangah hman niin, thisen pe tamte hnenah chawi­mawina hlan a ni a; Day thupui chu 'Eng nge tih theih kan neih? Tunah thisen pe la, pe chhunzawm zel rawh' tih a ni.

WBDD hi Aizawlah chuan Mi­zoram State AIDS Control Society (MSACS) leh Association for Voluntary Blood Donation (AVBD) huaihawtin Chanmari YMA Hall-ah hman a ni a, Health minis­ter Lal Thanzara'n a hmanpui.

Lal Thanzara chuan, "Damlo mangang leh ṭanpui ngaite tana a thlawna thisen petute tluka zah tur leh ngaihsan tur an awm chuang lo a, thisen pek hi intihhmuh chi a ni," a ti a; thisen pek chu incheina mawi leh ropui berah hmang turin kal khawmte a fuih.

Kum tin rîkrum thila thisen pek ngaite tan blood bank-a thisen awm sa hmangin mi nunna tam tak chhanhim a ni tawh tih sawiin, Lal Thanzara chuan, "Khuarel chhiatna leh vanduaina vanga thisen mamawh hi tute pawhin kan tawh theih vek avangin tlawmngaia thisen pek hi a ṭul tak meuh a ni," a ti.

Khualzahawm Kannan Gopi­nathan, Aizawl DC chuan, thisen pekin a petute tan hekna leh tawrhna a awm lo a, a dawngtu damlote tan erawh nunna chhan theihna a ni tih a sawi a; Aizawl DC pisa leh Aizawl Civil Hospital Blood Bank ruahman angin, a thlawna thisen petute'n an thisen pek sa damlote tana hman a nih apiangin an mobile phone-ah lawmthu sawina, thisen chu damlote tana hman a nih thu hriattirna leh pe chhunzawm zel tura sawmna thawn chhuah ṭhin a nih thu a sawi bawk.

Inkhawmah hian April 2016 - March 2017 chhunga pawl hminga thisen pe tamte hnenah chawimawina hlan a ni a; thisen pe tam ber pawl chu KṬP niin, donation camp ṭum 49-ah thisen unit 3,798 an pe a, hei vang hian Central KṬP hnenah Special Award hlan a ni.

AVBC geenral secretary C Lalnunnema report danin, Kum 2016-17 chhung khan Mizorama thisen pek zat chu unit 25,895 a ni a, unit 21,563 (83.27%) chu a thlawna pek a ni. Kohhran pawlte'n unit 8,146 an pe a, zirna-inte'n unit 3,986, YMA-in unit 1,988 leh pawl dangte'n unit 2,303 an pe. Pawl hminga pek ni lo, mahni remchan anga blood bank-a thisen pek zat chu unit 5,140 a tling.

Pawl hminga thisen pe Ṭha zualte
RELIGIOUS CATEGORY
1-na Youth Evangelical Fellowship Unit 780
2-na SAY, Central South Division Unit 310
3-na ṬKP Coordination, Aizawl Unit 226
YMA CATEGORY
1-na Keifang Joint YMA Unit 132
2-na Ramhlun North Branch Unit 121
3-na Bethlehem Vengthlang Branch Unit 108
EDUCATIONAL INSTITUTION
1-na Govt. Aizawl College Unit 354
2-na Pachhunga University College Unit 320
2-na Hrangbana College Unit 320
3-na T Romana College Unit 249
MISCELLANEOUS CATEGORY
1-na Inter College Youth Adventure Club Unit 120
2-na Congress party ṭhalai Unit 94
3-na 225 Bn. CRPF Unit 76
SPECIAL AWARD - Central KṬP Unit 3,798