KHAWTHLIR

Châwl dawn lo
Vawiin hi YMA Day, sorkar chawlh ni ni mah se, Aizawla Taxation office hrang hrang - North Zone, South Zone leh Central Zone pisate chu sumdawngte Goods and Service Tax hnuaia an migration tihpui turin hawn a ni dawn a; GST migration chungchanga hriat duh leh harsatna nei tan dawr theih an ni ang.

Fimkhur ngai
Tunlaiin ruah a sûr nasat avangin Tuirial Hydro Electric Power Project tuikhuahah tuiin a chîm sang zel a, hei vang hian tuikhuaha tui tling chu paih ṭhen a ni dawn. Kolasib DC chuan hriattirna chhuahin, Tuirial HEP tuikhuah leh a chhehvelah picnic leh thil dang tia kal lo turin mipui a hriattir a, loh theih loha kal ngaite pawh fimkhur turin a hriattir a ni.

Vawiin dry day
Excise & Narcotics department chuan vawiin, June 15 hi YMA Day a nih avangin zu hralh, lei leh in phal loh ni, dry day-ah an puang a; dan bawhchhe lo turin mi tin an ngen.

Zu rûi 153 man
Excise & Narcotics department chuan May 2017 chhung khan zu zuar mi 60 leh zu rûi mi 153 an man. Rak zu litre 593.025 leh fûn 20, zu bilh lai ṭín 114, dawidim kg. 8.3, sap zu ûm 1,320 leh can sarih, beer um hnih leh can 1,266, zu sakna bêl pakua an man a; zu kaihhnawihah lirthei paruk an man bawk.

Thupek hlîp
Kolasib district-a zu dawrte inhawng lo tura tihna thupek ding mek chu June 12, 2017 khan hlih a ni. Kolasib-ah hian Joint Action Committee-in kawngpui an dan kaihhnawihah zu dawr hawn phal lohna thupek hi June 5, 2017-ah chhuah a ni.