Chhiatna thlenga thi ruang 4 la hmu lo

June 13, Thawhlehnia Mizoram hmun hrang hranga chhiatna a thlen hnuah, ruah sûr a tlêm tâk deuh avangin chhiatna lian tham thlen belh a awm lo. Hetih lai hian, Tlabung sub-division huam chhunga chhiatna thlenga thi zing-a mi pali ruang hmuh a la ni lo.

Thu dawn danin, Marpara khuaa thi mi pathum zinga pahnih ruang hmuh ni tawhin, pakhat ruang hmuh a la ni lo. Phairuang-kaiah pawh thi mi pali zinga pahnih ruang hmuh a la ni lo a, pakhat ruang hmuh a ni tawh a; chhiatna thlen hmaa thi nausen ruang pawh hmuh a la ni lo. Changpui khuaa leminin a hnâwl mi pahnihte ruang chu hmuh ve ve a ni tawh thung.

Tlabung leh a chhevela tuilian chuan kiam lam a pan hret hret a, Sairanga tuilian chu a kâm vek tawh a, in chîm pawh a nei tawh lo.

Sairang aṭanga thu dawn dan-in, tuilianin in a chîm zinga in pali chu luah zui tlak a ni lo tih finfiah a ni tawh a, tui kâmin engtin nge a pawh chhiat dawn hriat a nih loh avangin luah zui tlak loh in dang pawh la awm theia ngaih a ni. Sairangah hian chhungkaw 52 chu an bungrua thiar chhuah a ni a, tuilian a kiam tawh avangin nimin khan an bungruate thiar luh leh a ni.

Sairang Dintharah chuan tui-lianin in pakhat a chîm vek a, hlauhthawn thilah chhung-kaw 15 vel an inthiar chhuak. Tui-lianin a chim inte hi nimin khan khawtlangin luah theih turin an chei ṭha a ni.

Saron Veng YMA hruaitute hnen aṭanga thu dawn danin, leiminin an venga in a hnâwlna hmunah thil thleng thar a awm lo. Saron Venga leimin vang hian Thawhlehni khan chhungkaw 105-te bungrua thiar chhuah a ni a, nimin khan hlauhthawn thilah chhungkaw dang pathumte bung-rua thiar chhuah leh a ni bawk.

Hetihlai hian Hunthar Venga B Sairengpuii in chu Thawhlehni zan khan ṭhenkhat a chim a, in chim hian in dang a pawh tlak lohna atan nimin khan disaster management lama mithiamte'n a inzawmna lai an ṭhiat a ni.