Governor-in vanduaina tawkte a tawrhpui thu a sawi

Governor Lt.Gen. Nirbhay Sharma chuan thu-chhuah siamin, tun hnaia ruah-sûr nasa vanga Mizoram hmun hrang hranga harsatna tawktu te, in leh lo chán leh nunna chánte an awm chu pawi a tih tak zet thu leh chhiatna tuarte a tawrhpui thu a tarlang.

Larsap chuan, chhiatna thleng mekah sorkar-in theihtawp chhuahin chhawmdawl hna a thawk tih a tarlan rualin, in sak dan leh in leh a chhehvel enkawl danah fimkhur a ṭulzia hriat nawn ṭha a tih thu a sawi a, "Fimkhurna leh sorkar inkaihhruaina-te zâwm chunga hmalak hi chhiatrupna lian zawk pumpelh theihna a ni," a ti.

Aizawl khawpui, mi-hring bitna leh in sak dan mumal tâwk lo ah chhungkaw tin fimkhur a ngaih thu sawiin Governor chuan, "Fimkhur lote vang-in mi zawng zawng din-hmun hlauhthawnawm-ah a awm theihna a ni," a ti a; in sak dan kalphung-ah thuneitute thu awih turin mipui a ngen a ni.

Lt.Gen. Nirbhay Sharma chuan, chhiatna thlenga thlenga sorkar, khaw-tlang mipui, tlawmngaite leh pawl hrang hrang hmalaknatete chu ṭha a tih thu a tarlang bawk.