MSCU-in khawmpui an hmang

Mizoram State Cooperative Union (MSCU) chuan nimin khan Synod conference hall-ah khawmpui an hmang a, chief minister Lal Thanhawla'n a hmanpui.

Chief Minister chuan Mizo khaw-tlang nun ngaihtuahin cooperative movement kan khawsak zia nen a inrem hle tih sawiin, "Khawsa hoa, inpui tawn a, inpei zawn tawn zel thin kan nite leh kan thu-fing ‘Sem sem dam dam, ei bil thi thi’ tih te pawh hian cooperative pawimawhna lam a kawk viau niin ka hria," a ti.

India ramah cooperative movement bul ṭanna a rei tawh thu sawiin Lal Thanhawla chuan, "Tun hma lamah cooperative movement Mizorama a kalpui dan a ṭha tawk loin, duhthusam a ni lo ṭhin," a ti a, tun hma ngaihtuah chuan co-operative movement kalpui dan kan thiam tawh thu a sawi.

CM Hawla chuan ram chhung hmun dangah Cooperative Housing Society-te hi an tangkaipui hle tih sawiin, "Mizorama kan din theih chuan mipui mimir tam tak, thingtlang mipui thlengin an hlawkpui thei dawn a, ngaihtuahna sen ṭha hle," a ti.

Sorkar anga thil tih, hlawhtling thei lo te hi cooperative anga kal hian kan hlawhtling thei a ngem em tih ngaih-tuahna a neih thu sawiin Chief Minister chuan, "Cooperative movement a tel mek ten tumruhna leh thawhrimna an neih chuan khawvela cooperative lama hlawhtling pawl tak AMUL angin hlawhtlinna a hmuh ngei ka beisei," a ti a, National Cooperative Development Corporation chu kuthnathawktute ham-ṭhatna atan nasa zawka hman ṭangkai dan zawn a ngaih thu a sawi.

Mizoram State Cooperative Union hi kum 1975 ah din niin thawktu nghet 24 leh a nghet lo mi 5 an awm mek. MSCU hnuaia cooperative society hrang hrangah sorkar hian share capital nuai 2500 vel a nei a, heng society hrang hrang katlangin mi 3000 chuangin eizawnna an nei a ni.