Hlawh lâk hun tur hriat a ni lo ; Department-te'n hlawh tur an thehlut

Mizoram sorkara department leh pisa hrang hranga hlawh buaipuitu drawing and disbursing officer (DDO)-te chuan July 2022 thla hlawh tur treasury-ah an thehlut tawh hlawm a; chutih laiin, sorkar hnathawkte'n hlawh an lâk hun tur hriat theih a ni lo

Vanglaini thu dawn danin, DDO-te hian sorkar hnathawkte hlawh tur thla khata ni 20-na vel aṭangin treasury-ah an thehlut ṭhin a, tun thla (July) hlawh tur pawh ni 20 aṭang khan pisa hrang hrangte chuan an thehlut hlawm. DDO-te chuan hlawh tur an thehluhin not pay before (NPB) an ziak tel ṭhin a, July thla hlawh turah erawh treasury hotute'n ziak lo tura an tih angin an ziak tel lo.

July 2022 hlawh chu August 10, 2022 hmain an lâk a rinawm loh tih thu lêngvâk awm mah se, hemi chungchangah hian Finance department chuan thu leh hla an nei lo. Hetih lai hian, Mizoram sum dinhmun chungchangah Finance department-in chawlhkar tharah thuchhuah an nei dawn nia thu dawn a ni.

Treasury zinga sum pe chhuak hnuhnung berin a pek chhuah ni hnuhnung ber chu July 22 kha a ni a, holiday ni zuiin, July 25, Thawhṭanni aṭang khan sum an pe chhuak tawh lo a, nimin thleng khan an la pe chhuak leh lo a, sorkar pisa kai ní-ah ni nga chhung sum an pe chhuak tawh lo nia thu dawn a ni bawk.

Finance department hotute chuan nimin khan treasury officer-te an ṭhutkhawmpui a, tunlaia Mizoram sorkar sum dinhmun an sawipui nia hriat a ni.

Tarlan tawh angin, thla khata ni 20-na vela hlawh la ṭhin sorkar hna a nghet loa thawk muster roll, workcharge leh provisional employee-te chuan nimin thleng khan June thla hlawh an la la lo.

Sorkar hna a ngheta thawk leh a nghet loa thawk te hlawh lak hun a inang lo a, a nghet loa thawkte tan chuan ni 20 hi thla thar a ni a, ni 20-na bawr velah hlawh an la ṭhin a ni.