Sipaiah brigadier pelh tum turin HM-in Mizo sipai officer-te a chah
Sainik Welfare and Resettlement department-in Mizo zinga sipaia ṭang tawhte leh ram tana nunna hlan tawhte chanchin an buatsaih 'Lest we forget' tih lehkhabu chu nimin khan Home minister Lalchamliana'n Assembly Annexe conference hall-ah a tlangzarh. Minister chuan, Mizo sipai officer-te chu brigadier pelh tum turin a chah.
'Lest we forget' lehkhabuah hian Mizo sipai leh officer ni tawhte chanchin tâwi te, Indopui Pahnihnaa V Force-a tel Mizo zawng zawngte hming te, sipai chawimawina dawng tawhte, Indona leh ope-ration-a ram tana nunna hlantu sipaite hming tarlan a ni. Tlangzarhnaah hian Sainik director Surg.Lt.Cdr. Lalnuntluanga'n inlawmna thu a sawi.
Home Minister chuan, Mizo zingah sipaia ṭang duh an tam leh ta chu lawmawm a tih thu sawiin, Mizo tam zawk sipaiah lut thei se a duh thu a sawi a, "Officer ni theite'n ṭan la lehzual ila, brigadier pelh tum hrâm ang u, theihna kan nei a ni," a ti.
'Lest we forget' tih lehkhabu chu ṭhangtharte tan thil hlu tak a nih a rin thu sawiin Lalchamliana chuan, "Mizote sipaia kan tel ve a, kan thawh hlâwk ve dante academic lama chhuitu an awm hunah phei chuan a hlu hle ang," a ti a; Mizo sipaite chu India ram tihmingṭhatute an nih thu a sawi.
Mizo sipaite chu ram tan an hlut thu sawiin Chama chuan, "Kan ram economy siamtu hmasate an ni. Kan ram tan an ṭangkai em em a, kohhran, khawtlang leh politics-ah mi ṭangkai tak tak an ni a, Mizo society a ṭha zawnga siamtu pawimawh tak an ni," a ti.
Lalchamliana chuan, sipai bángte hamṭhatna tur leh Mizoram sorkara an luh theihna tur Mizoram sorkarin a ngaihtuah thu sawiin, "State sorkar a intodelh loh êm avangin ama kutin eng mah a tihlawhtling thei lo a, central kan la au eih thei si lo a, an phú anga sorkarin a enkawl thei lo chu a pawi khawp mai," a ti a; "Police-ah ex-service-te tan reservation kan siam thlap tawh a, kan inpeih meuh chuan Covid a ni a, sum dinhmun enin, i ti rih lo ang tih hi sorkar thutlukna a ni," tiin, an la tihlawhtling thei lo chu pawi a tih thu a sawi.
Home Minister chuan, India ramah Mizote chiahin governor an la nei lo tih sawiin, sipai officer báng zingah governor ni tawh eng emaw zat an awm laiin Mizo zingah an la awm ve loh thu a sawi a, "Engati nge kan nih theih loh bik tih ka ngaihtuah fo. Sipai báng emaw, civil mi emaw, eng mi pawh ni se, governor nei ve thei ila ka ti hle a ni," a ti.
'Lest we forget' tlangzarhnaah hian Assam Rifles 23 Sector DIG Brig. Digvijay Singh pawhin thu a sawi a ni.