NH kawng laihnaa dan bawhchhiat dan SMR-in NHIDCL hotute hnenah an thlen

Save Mizoram Rivers (SMR) chuan National Highway-302, Lunglei-Tlabung kawngpui siam mekah National Highways and Infrastructure Deve­lopment Corpora­tion Limited (NHIDCL) leh a hnuaia contractor-te'n duhdah taka hna an thawh dan leh chumi avanga mi pahnih an thih tawh dante nimin khan New Delhi-a NHIDCL hotute hnenah ziakin an thlen.

SMR chuan, contract condition-ah NH kawngpui laih leh siam­ah lirthei tlàn turte tan harsatna a awm loh nan hmalak tur a nih laiin, lirtheite ṭha taka an tlân theih nan NHIDCL-in hma a la lo tih an tarlang a, "NH-302 kawng chhe lutuk avanga chetsualnaah Lalmalsawma, Lung­lei Ramthar leh R Lalthan­tluanga, Chhipphir khuate an thih phah tawh a, mitthi chhungte hnenah NHIDCL-in zangna­dawmna an pek ngei mipuiin an beisei a ni. kawng chhe lutuk avangin mipuiin sum tam tak an hloh phah bawk," an ti.

SMR chuan, NH kawngpui laih danah tualchhung mite'n NHIDCL-ah ngenna an thlen tawh ṭhin tih tar­langin,"Mizorama NHIDCL hotute'n an hnena tual­chhung mite'n ngenna an thlente an lo hnawl fithla ṭhak zel a ni," an ti a; hna thawh chhiat lutuk avangin Tlabunga YMA, truck/pick-up pawlte leh maxicab pawlte'n July 30, 2022-ah hnatlangpui huaihawt an tum hial thu leh NHIDCL tan thil zahthlak tak a nih tur thu an tarlang.

NHIDCL leh a hnuaia contractor-te'n envi­ron­mental law-te an bawhchhiat nasat thu leh environmental clearance nei loa hna thawh a nih thu ziakin SMR chuan, "Kawng laihna leivungte spoil bank ni loah nasa taka paih a ni a, chu chuan tualchhung mite eizawnna a tihchhiat bakah, thing leh mau leh luite nasa takin a tichhia a ni," an ti.

SMR chuan, NHIDCL-in Mizoramah hma­sawnna hna an thawk chu lawmawm an tih rualin, dan loa nasa taka environment an tichhe tel chu an duh loh thu tarlangin, dan ang taka ṭha tak leh environmental law zawm chunga hna thawk turin NHIDCL leh an hnuaia contractor-te an phût thu an ziak bawk.

SMR hian lehkha an thehluhah hian NH-302 dinhmun tarlanna thlalak eng emaw zat an thil tel a; hma la thuai turin NHIDCL Managing Director an ngen a ni.