Chief Minister-in Mizoram a enkawl danah lungawi a har - ZPM Leader

ZPM leader Lalduh­oma chuan, Mizoram sorkarin centrally spon_sored scheme (CSS) sum a pek chhuah tawh a hnûk lêt a nih chuan an ngawihpui mai dawn loh thu sawiin, Chief minister-in Mizoram a enkawl danah lungawi har an tih thu a sawi.

Lalduhoma hian nimin khan Khawzawl Zuchhip Veng leh Khualenahte vantlang inkhawmah thu a sawi a, "Chief Minister-in kan ram a enkawl danah lungawi a har kan ti a. A kutah budget kan dah ngam tawh lo. Kan Finance Commissioner-in kan ram sum dinhmun ṭhat lohzia chiang takin a sawi a, sorkar official-te hial an ṭawng chhuak hian kan sum dinhmun ṭhat lohzia a tarlang chiang hle a ni," a ti.

Sorkar laipui thu angin CSS sum vaibelchhe tam tak Mizoram sorkarin a pe chhuak nia an hriat thu leh lawmawm an tih thu sawiin Duhoma chuan, "Chutiang a nih lai chuan Central hmuha pe chhuak tawh anga lang siin Mizoram sorkarin a pek chhuah tawhte hnen aṭangin eng emaw zat chhuh lêt tumna a awm mek nia hriat a ni," a ti a; CSS sum pek chhuah tawh hnuh lêt a nih chuan uluk takin an en zui dawn thu a sawi.

Lalduhoma chuan, CSS sum pek chhuah tawh anga lang, a neitu tur department hnen thleng lo a awm a nih chuan department-te'n sum hman tur a kimin an nei dawn lo a, utilisation certificate thehluh turah harsatna a awm theih thu a sawi a, "Central hmuha pe chhuak tawh anga inlantir a, department aṭanga sum hnuh lêt a awm tak tak a nih chuan thil fel lo tak a nih dawn a, kan ngawihpui mai mai dawn lo," a ti.

ZPM Leader hian nimin zing khan Khawzawl Hospital a tlawh a, doctor-te leh thawktu dangte nen inkawmin, harsatna an neihte a sawipui. Duhoma chuan, ZPM an sorkar chuan hriselna lam leh zirna lam an ngai pawimawh dawn thu a sawi a, "Heng department pahnihte tan hian sorkar kan hrawn mek hian budget-ah hmasawnna tling khawp sum a dah ngai lo a ni," a ti bawk.