Pension tawh rawih nawnna tur thupek sût turin sorkar phût

MZP General Head­quarters chuan thuchhuah siamin, sorkar hnathawk pension hun pawhsei leh pension tawh rawih chhunzawm an duh lohna chu an dinna ngai reng a la nih thu an tarlang a; pension tawh rawih nawnna tur thupek sût turin Mizoram sorkar an phût.

Pension tawh rawih nawn chungchanga Mizoram State Coop­e­rative Service Asso­cia­tion (MSCSA) hruaitute'n Cooperation department-a Additional Registrar Cooperative Societies pension tawh rawih nawn tum a nih avanga an dinna ngaihtuah nawn tura an ngen angin MZP hruaitute chu nimin khan an ṭhukhawm a; an thutlukna sawh sawn loin, an dinna ngaia din an titlu a ni.

MZP chuan, Coope­ration Addl. RCS pension tawh rawih nawnna tur thupek (order) sût turin Mizoram sorkar an ngen a, "Hnuh kìr loh a nih chuan hmalakna hmasa atan August 1, 2022 chhun dar 12-ah pension rawih nawnna order hâl ni se kan ti," an ti a; awmzia a neih loh chuan a ṭul anga hmalak zel an tum thu an tarlang.

MZP hian pension tawh ruai nawn lo tura ngenna May 25, 2022 khan Chief Minister hnenah ziakin an thlen tawh a ni.