Buhfai thla 3/4 daih chhêk khâwl a ni - Supply Minister

FCSCA minister K Lalrinliana chuan nimin khan Mizo Hnam Rúna inkhawmah thu sawiin, harsatna eng emaw a thlen thut pawhin Mizoram mipui ei tur buhfai thla thum/li daih chhêk khâwl a nih thu leh MNF sorkar chu Pathian mite ṭawngṭai chhuah a nih thu a sawi.

K Lalrinliana chuan, "MNF hi kan ṭhat bik vang ni loin, mipui leh Pathian mite'n an ṭawngṭai chhuah a ni," a ti a; harsatna hrang hrang thleng tur hre lâwktu Pathianin hun harsa leh khirh laia Mizoram kaihruai turin Zoramthanga sorkar a ruat niin a sawi a ni.

Supply Minister chuan, a bial chhunga leilet tamna hmunah Agriculture Minister hoin rice mill an din tawh thu sawiin, tih tham mipuiin an la thar lo chu pawi a tih thu a sawi a; Champhai lam buhfai a ṭhat thu leh a man a to bik thu sawiin, "Pathianin eng hunah emaw chuan min la intodelhtir ngei ka ring. Intodelh rih lo mah ila, ration-ah harsatna a awm lo. Buhfai kan thar chhuah tlem ngaihtuahin, eng emaw thut lo thleng mah se, thla thum/li ei stock sa kan nei," a ti.

MNF-in sorkarna an chan hlimah Chief Minister hoin NFS, BPL/APL tan ration-ah Mizoram thar ngei lei an tum thu sawiin Minister chuan, "Mizoram hian thla khatah buhfai quintal 1,00,000 chuang a mamawh ṭhin a, Mizo thar kan lei kha quintal 23 lek a ni," a ti a; Mizoram thar ngei lei an duh thu leh lei tur duhkhawp an hmuh loh thu a sawi.

K Lalrinliana chuan, ram a buai thut thei a, ration lâk reng theih a ni lo thei tih sawiin, "Mizote kan intodelh a ṭul. Kan CM hoin SEDP Governing Board-te'n eizawnna ngêlnghet an ngaihtuah zel a, family oriented-a kalpui mek a ni," a ti.

Fisheries minister ni bawk K Lalrinliana chuan, "Mizorama sangha kan thar hi state danga châwk luhte aiin kan hralh tláwm thei lo; a chhan chu, head load-a sangha phurh chhuah a ngai ṭhin," a ti a; harsatna sukiang turin DPR an siam a, an thehluh tawh thu a sawi a ni.