Sorkarin tuna sum a neih loh dan chu a tàwp khâwk tawh - ZPM Working President

ZPM working president K Sapdanga chuan, Mizoram sorkarin tuna sum a neih loh dan chu a tàwp khâwk tawh a, sorkar hnathawk hlawh tur pawh a buai mek tih a sawi.

K Sapdanga leh ZPM hruaitu dangte chuan nimin khan Bilkhawthlir, Vairengte, Phainuam, Saihapui-V leh North Chhimluang khuate an tlawh a; Vairengtea Serlui North Block Political Training-ah thu sawiin Sapdanga chuan, "Tuna kan sorkar pawisa neih loh dan hi a tàwp khâwk, a mawng náwi a ni. Loh theih lohin sorkar hnathawk hlawh a buai mek. Sum chungchang hi kan MLA-te'n an chhui mek a ni," a ti.

ZPM Working President chuan, kum 2023 inthlan dáwnah Serlui biala candidate turte chu a pu tur chhût ngun a ṭul thu sawiin, "Bial chak bera ngaihah rorel lai thlâ a phâng a, bialtu MLA an sawi thei tawh lo. Tu nge a pu ber tihah an buai a ni," a ti a; MNF sorkarin hlauh an ngah a, eng kohhran emaw an inkhawmpui leh neutral-te inhmuh khawm an hlau hle niin a sawi.

Sorkarna chu dan bawh-chhiatna license a ni lo tih sawiin Sapdanga chuan, "A langsar lai berah pawh thuneitu sang berte'n dan an bawhchhiat ngat ngatna ramah hian 'Hawh u, i intélkhawm teh ang u' kan ti a ni. Tun dinhmunah dan zawm alawi kan nei lo," a ti.

K Sapdanga chuan, tun dinhmunah Congress platform aṭanga thusawi a manganthlak tih sawiin, "Mipuiin an bengkhawn lo a, kohhranin an bengkhawn lo a, zirlai tìtîah an lang tawh lo," a ti a; kum 2023 inthlanpuiah ZPM leh MNF-te'n final an khel dawn tih sawiin, "Inthlan hi ZPM tan a nghahhlelhawm thlâwt a, kan khingpuite hi khelhpui tak tak ngai loin khelh tham vak an ni dawn lo," a ti bawk.