Kan danglamna mite'n an hmu tur a ni - MNF Vice President

MNF vice president Vanlalzawma chuan, MNF chu an danglam bik tur a ni tih sawiin, contract hnathawhah an danglam bikna a lang tur a ni a, chu chu mite'n an hmu tur a ni tih a sawi.

Vanlalzawma hian nimin khan Bilkhawthlir community hall-a MNF Serlui South Block political training-ah thu sawiin, "MNF hi party dangte nen kan inang lo, kan danglam bik. Ram leh hnam tana ram mú a, martarte thisena chawi nun, Mizo hnam lungphûma innghat kan ni. Kan contract hnathawhah kan danglam bikna a lang tur a ni a, party dangte aia kan danglam bikna hi mite'n an hmu tur a ni," a ti.

Zoramthanga kaih-hruai sorkar hmalaknate miin an hmuhin belh tlakah an ngai nia sawiin Vanlalzawma chuan, "Mi thar duhawm tak tak vawiin thlengin lawm luh tur kan la nei zel a ni," a ti a; tlàwmna nun nena politics khelh a pawimawh hle thu a sawi.

MNF Vice President chuan, mi ṭhenkhatin social media hrang hrangah mipui rilru hruai kâwi tumin thu-va-ûk leh thu dik chanve hmangin sorkar leh party beihna an tidarh ṭhin nia sawiin, "Hengte hi thu dik zawk nena kan ûm zui a, mipui hnena thu dik hriattir ṭhin hi kan tih tur a ni," a ti.

Inkhawmah hian Serlui bialtu MLA Lalrinsanga Ralte pawhin thu a sawi bawk.