'Mizo ṭawng ziah dan dik' tlangzarh

School Education minister Lalchhandama Ralte chuan nimin khan a pisaah Mizo Grammar Society buatsaih ‘Mizo ṭawng ziah dan dik’ tih lehkhabu a tlangzarh. Minister chuan, "Social media-ah Mizo ṭawng hman dan dik lo a tam a, ṭhangtharte zingah ziah dan dik hre lo an tam tawh hle," a ti.

Lalchhandama Ralte chuan, khawvel hriata Mizo ṭawng pho lan a nih theih nan sorkarin hma a la a, Mizo ṭawng tihhmasawn a ṭulna leh hnam inpumkhatna atan Mizo ṭawng pawimawhnate hriain tihhausaka tihlâr a ṭul tih sorkarin a hria tih a sawi a, "SEDP board 14 din a nih khan Human Resource Development Board pawh din a ni a, HRD Board hnathawh tur zingah CM-in Mizo ṭawng humhalh leh tihhausakna tura hmalak a sawi tel," a ti a; hmalakna kal zelah Mizo Language Board (MLB) din a nih thu a sawi.

MLB chu gazzette-a chhuah a nih hnuah Law & Judicial department pawmpui tura thehluh a ni tawh tih sawiin Minister chuan, "MLB pisa tur tihfel a ni tawh a, MYC pisa hlui chu an luah dawn. Chairman leh secretary tur hun rei lo têah tihfel a ni ang," a ti.

Education Minister chuan, social media-ah Mizo ṭawng hman dan dik lo a tam thu leh ṭhangthar zingah ṭawng ziah dan dik hre lo an tam tawh thu sawiin, "Mizo ṭawng ziah leh hman danah tun hmain thuneitu mumal an awm lo a, tun hnaiah sorkarin School Education department chu thuneihna a pe a ni," a ti bawk.