J Thankima College building thar hawng

Higher & Technical Education (HTE) minister Dr R Lalthangliana chuan nimin khan J Thankima College-ah Rashtriya Uchchatar Shiksha Abhiyan thawh hnihna (RUSA 2.0) sum nuai 160 hmanga sak academic building thar a hawng.

HTE Minister chuan, J Thankima College-in kum 30 hmel a hmu tawh tih sawiin, "College changtlunna tura thawktute inpekna a chhuanawm a, in sum thawh khawma classroom in sa te, college sum aṭanga Geography subject in hawngte leh in hmalakna dangte a fakawm hle a ni," a ti a; Mizorama sorkar college zingah management zirna awmchhun a nih thu sawiin, sorkar pawmpui tura an dilna chu ngaihtuah a nih dawn thu a sawi.

Zirlaite chu zirtirtute zah thiam a, tumruhna leh taimakna nen khawvel hmachhawn tura chahin R Lalthangliana chuan, "A huphurh zawngin khawvel thlir lo u la, theihtawp chhuaha bei ṭâng ṭângte tan khawi hmunah pawh dinchhuahna a awm," a ti.

Academic bulding thar hi Mizoram Technocrats company-in March 9, 2019-ah sa ṭanin, March 16, 2021-ah an sa zo a; classroom pariat siamin, zirlai 288 len theihna tura ruahman a ni.

J Thankima College hi September 9, 1993-ah din a ni a, Durtlanga Lalhmingthanga College nen kum 2002-a an infin hnuah J Thankima College tih zui niin, deficit-ah dah a ni. August 14, 2007-ah Mizoram University permanent affiliation an hmu. Zirlai 1,050, principal pakhat leh zirtirtu 40 leh thawktu dang 12 an awm mek a ni.