Finance Minister aṭanga báng turin phût

ZPM Ṭhalai chuan thuchhuah siamin, Finance enkawltu chief minister Zoramthanga chu Mizoram sum a enkawlnaah a hlawhchham avangin Finance minister a nihna aṭanga báng thuai turin an phût.

ZPM ṭhalaite chuan, sorkar laipui thuchhuah anga Mizoram sorkarin cheng vbc. 600 an pek chhuah avangin sorkar sum dinhmun nasa takin a tlahniam tih sawiin, "Sorkar hnathawkte July thla hlawh pawh August 15, 2022 hmaa pek chhuah theih a ni lo mai tur hi sum enkawl kawnga Finance minister Pu Zoramthanga hlawhchhamna pholangtu chiang takah kan ngai a, a hna a tlin loh avangin Finance minister hi báng thuai turin kan phût a ni," an ti.

Mizoram sorkar sum dinhmun ṭha lo tak leh leiba a ngah lutuk chu an vei thu sawiin ZPM Ṭhalai chuan, "Minister leh MLA ṭhenkhatte'n CM an tlawn avangin sorkar sum dinhmun ṭhat lohzia phatmar tum mah se, Finance department chu ICU-ah a awm mek a ni tih phat rual a ni lo," an ti a; MNF hruaitute'n sum harsatna phatmar an tum zel tih sawiin, harsatna a awm lo a nih takzet chuan Dy CM Tawnluia'n a tiam tawh angin chhungkaw 60,000 hnenah July thla chhunga SEDP sem turin an phût tih an tarlang bawk.