July thlaah hripui vei mi 3,278 hmu tawh

July 28, Ningani khan Mizoramah swab sample 651 endik aṭangin Covid-19 vei mi 159 hmuh chhuah a ni a, July thla chhungin mi 3,278 hmuh chhuah a ni tawh. Nimin khan hripui vei dam tawh mi 127 chhuahtir an ni a, Covid-19 vanga thi an awm lo.

Ningania Covid-19 positive hmuh thar mi 159-te chu mipa 75 leh hmeichhia 84 an ni a, rapid antigen test hmanga hmuh chhuah vek niin, positivity rate 24.42% a ni.

Nimin khan Covid-19 vei inenkawl zinga mi 127 chhuahtir an ni a; district tina chhuak zat chu - Aizawlah mi 72, Lungleiah 17, Kolasib-ah 16, Serchhipah 10, Saitualah pasarih leh Mamitah panga a ni.

IDSP record angin, Mizoramah Covid-19 vei 2,32,384 hmuh chhuah a ni tawh a, mipa 1,08,203 leh hmeichhia 1,24,181 an ni a, mipa aiin hmeichhia 15,978-in an tam zawk. Nimin tlai dar 5 thleng khan mi 2,30,879 (99.35%) chhuahtir an ni tawh a, mi 710 (0.31%) thi tawhin, enkawl mek mi 795 (0.34%) an awm.