KHAWTHLIR

Thisen pe
Nimin khan Kolasib New Diakkawn Branch YMA chuan an veng community hall-ah thisen pek an huaihawt a, Kolasib District Hospital tan thisen unit 27 an pe a, petute mipa 16 leh hmeichhia 11 an ni. DIET, Siaha zirlaite pawhin nimin khan District Hospital tan thisen unit 24 an pe a, petute mipa 20 leh hmeichhia pali an ni.

Ainawn Veng
Aizawla veng pakhat, Govt. Complex chu Ainawn Veng tia thlâk a ni. Veng hming thlak chungchangah hian Aizawl Municipal Corporation chuan nimin khan hriattirna a chhuah a; Govt Complex Local Council, kohhrante leh pawl dangte'n an dil anga thlak a nih thu a tarlang.

HIV/AIDS zirho
MSACS leh UNICEF chuan July 28-29, 2022 khan Hospital & Medical Education conference hall-ah 'State Level Consultative Workshop' an buatsaih a, Health secreyary Esther Lalruatkimi'n a hmanpui. Zirhonaah hian Mizo ṭhalai, a bikin tleirawlte HIV/AIDS laka an invênna leh inenkawl tura sorkar department, pawl, khawtlang hruaitute leh kohhran ṭhalai hruaitute'n thawhhona ṭha an neih theih dan tur sawiho a ni.

Police-in meth man
Mizoram Police Special Narcotic Branch (CID) chuan July 28, Ningani khan Ṭhuampui, Aizawlah methamphetamine kg. khat an man a; a neitua puh Taju Uddin (19) s/o Abdul Khalid leh Sahab Uddin (25) s/o Noor Ali, Karimganj, Assam ve ve bakah, inhnamhnawiha puh Lalnunsiami (43) w/o Lalramnuna, Electric Veng, Aizawlte an man bawk. Meth hi international market-ah Rs 3,00,00,000 hù a ni.

Zirlai chawimawi
MZP Hqrs, Mamit chuan nimin khan Chhimveng YMA Hall-ah kumina zirlai pass-te an chawimawi a, bialtu MLA H Lalzirliana'n a hmanpui. Zirlai 78 leh sikul ṭha bera thlan Presbyterian English School hnenah chawimawina hlân a ni.