Revenue leh Forest-in ram an inchuh ; Vairengte-Sairang kawng la zauh thei lo

Ministry of Road Transports & Highways (MoRTH) hmalak­naa NH-06 leh NH-306 (Vaireng­te leh Sairang inkar) thlúr lí (four lane)-a zauh turah Land Revenue & Settlement (LRS) leh Environment, Forest & Climate Change (EFCC) department-te'n ram inchuh an nei. Department pahnih ram inchuh avang leh forest clearance avangin kawngpui zauh hna ṭan theih a la ni lo.

Kawng zauh hna viltu tur National Highways and Infrastructure Development Corporation Limited (NHIDCL) hotute chuan Vanglaini palai zawhna chhángin, kawng zauh tura ram lâk turah LRS leh EFCC department-te'n ram inchuh an neih thu an sawi a, "Department pahnihin ram inchuh an neih avang hian ram lâk tur tihfel theih a la ni lo a, ram lak tur tihfel a nih hma chuan kawng zauh hna thawh theih a ni lo," an ti.

NHIDCL hotute chuan, department pahnihin ram an inchuh chungchang chu Chief Minister hoin sawiho a nih tawh thu sawiin, "Harsatna hi chinfel thuai a nih kan beisei," an ti a, harsatna chinfel a nih veleh ram lâk a nih tur thu an sawi.

EFCC department-ah forest clearance an dil mek thu sawiin NHIDCL hotute chuan, "Beisei aiin EFCC lam hi an muang. Vairengte-Sairang inkar kawng zauh ruahman dan chuan kum 2023-a zawh tur a ni a, tun dinhmunah chuan zawh hman a nih a rinawm tawh lo. Harsatna awm ang ang chinfel vat a, hna thawh ṭan vat kan duh a, ṭan hun tura ruahmanah kan ṭan lo nasa tawh lutuk," an ti.

NHIDCL hotute chuan, zangnadawmna pek turah harsatna a awm an rin loh thu sawiin, "Kawng zauhna atana ram lâk leh zangnadawmna pekah kan inrawlh lo a, a buaipuitu tura Mizoram sorkarin a ruat competent authority for land acquisition (CALA) kan ring tawp a, ani'n engkim a buaipui vek," an ti. CALA atan hian Kolasib Additional DC ruat a ni.

Hetih lai hian, CALA-in Vairengte-Chhimluang inkara zangnadawmna lak zat tura a thehluh chu NHIDCL chuan tam lutuka an hriat avangin an pawm thei lo a, zangnadawmna chhût ṭha turin Chief Secretary leh Kolasib DC-ah ngenna an thawn. Hemi chungchanga harsatna chu tunah chuan chinfel vek a nih tawh thu NHIDCL hotute chuan an sawi.

NHIDCL-in kawng zauh hna thawk tura a thlan ṭhenkhatte chuan kawng laih zauhnaa hman tur lirthei leh khawl chi hrang hrang Vairengte leh a chhehvelah an chhawp tawh a ni.