Raltlân an lo lut tam tial tial, Ruihhlo man a tam tulh tulh - CYMA Vice President

Central YMA vice president Lalhmachhuana chuan, Myanmar buaina avanga Mizorama ráltlân rawn lut an tam tial tial a, chumi rual chuan Mizoramah ruihhlo man tur a tam tulh tulh tih a sawi.

Tun hnaia CYMA leh Labour, Employment and Skill Development depart­ment -in Lungleia central scheme puanzarna hun an buatsaihah thu sawiin Lalhmachhuana chuan, "February 2021 velah ráltlân kan nei ṭan a, ráltlân an lo lut tam tial tial a, ruihhlo man a tam tial tial. A tira Chief Minister hnena an ngenna, relief camp mumal tak siama awm khâwmtir chi a ni ta lo. Tunah chuan khawiah nge an awm? Sorkar, YMA leh ráltlân ho data a inmil tawh lo," a ti.

CYMA Vice President chuan, Mizoramah ruihhlo a hluar thu sawiin, "Kum 2019-ah heroin kg 23.700 vel Mizoramah man a ni a, kum 2020-ah kg. 20.360 man niin, kum 2021-ah kg 34.567 man a ni. Kum 2022-ah hian January leh May inkarah heroin kg. 20.814 man a ni tawh a, kumin chhungin kg. 50 chuang an man ngei dawn a ni tih a chiang," a ti a; ruihhlo mantute chuan ráltlân zinga mite'n ruihhlo an paipàwn ngei tih an chian thu a sawi.

Ráltlânte chu khawngaih a, lo tuamhlawm tur an nih thu sawiin Lalhmachhuana chuan, "Amaherawhchu, kan ṭhatna hi ruihhlo hmang hian min rawn thungrûl tur a ni lo," a ti.