Tuna Mizoramin a mamawh ber chu CM mumal a ni - ZPM Working President

ZPM party hruaitute chuan July 30, Inrinni khan state ramri bul, Vairengte leh Saiphaia ramri vengtu police-te an tlawh a, thilpek an hlân. ZPM working president K Sapdanga chuan, tuna Mizoramin a mamawh ber chu chief minister mumal a nih thu a sawi.

ZPM hruaitute hian Vairengte Aitlanga ramri vengtu sipaite tlawhin, theitui leh tui thianghlim báwm 20 an hlân a, Saiphaia police duty post an tlawh bawk. Aitlang an tlawh lai hian Assam lam chuan kháwl pahnih hmangin kawng an sial mek a, an sipai duty-te ration pekna tur kawng nia an hriat thu ZPM chuan an tarlang.

K Sapdanga chuan, Mizoram police-te'n hun rei tak aṭang tawhin ramri venhim hna an thawk tih sawiin, "In duty a nih rualin, ram tana hna ropui tak thawk in ni. Kan ram dinhmunah duhthusama induat a har rih deuh a nih pawhin, inthuam ṭhat dan kawng zawn a ngai hle mai. A nih loh chuan ramri chinfel dan thurûk hman a ṭul lutuk tawh," a ti.

MNF sorkarah minister-te leh MLA-te an khawngaihthlak hle tih sawiin Sapdanga chuan, "Ngawi rengin an tuar tlawk tlawk mai a ni. Tuna kan ramin a mamawh ber chu chief minister mumal a ni. Zoram hian Kamrula budget ni loin, kut hnathawktute thlai thar hralhna tur price support kan mamawh zawk," a ti a; ZPM auhla chu kut hnathawktute'n eizawnna ngêlnghet an neih theihna tura puih a nih thu a sawi.

ZPM Working President chuan, ZPM an sorkar chuan an hna hmasa ber tur chu kut hnathawktute dâwm kân a nih thu sawiin, "Kawng chhâwng sarih pawh siam ila, kan hmunphiah leh kan kuhva hralhna tur kan hriat si loh chuan eng mah a ni lo. Minister veranda-a eizawnna leh pu chuamte tlak ruala tlâkchhiat eizawnna hi tihbo a ṭul a, kut hnathawktute'n ngêlnghet taka ei an zawnna tur, thawk rim apiangte'n thlamuanna leh hlâwkna an neihna tura ram siam a pawimawh zawk," a ti.