Treasury an khâr mek ; Sum dinhmun chhiat chhan CM - Congress

Mizoram Pradesh Congress Committee (MPCC) Media depart­ment chuan, Mizoram sum dinhmun a chhiat chhan chu Chief Minister-in inrenchemna awm miah loa mipui sum a duhsak zawngte nen inthuruala a hman nasat vang a nih thu leh, treasury-te khâr mek a nih thu an sawi.

MPCC Media depart­ment hotute chuan July 30, Inrinni khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, sorkar treasury-te'n chawlhkar khat chhung sum an pek chhuah tawh loh thu sawiin, "Mizoram treasury hi khâr a nih thu puan ni lo mah se, tunah hian sum pek chhuah tur an neih loh avangin khâr mek a ni," a ti.

Dr Lallianchhunga chuan, "Heti khawpa kan sum dinhmun a chhiat chhan chu Chief Minister-in inrenchemna awm miah loa mipui pawisa a duhsak zawngte nena inthuruala a hman ṭeuh ṭeuh vang a ni... MNF hotute'n sum dinhmun chhia thup an tum nasa a, kan dinhmun a ṭha niin an la sawi lui reng," a ti a; sum dinhmun a ṭha a nih chuan sorkar hnathawk hlawh a hun takah pe a, GPF hréng tawh lo tur te, pension sum pe nghal tur te, contract bill leh health care bill táng zawng zawng pe thuai turin sorkar an phût tih a sawi.

MPCC Media Chairman chuan, Mizoram sum dinhmun chhe lutuk chu Home Minister leh Sports Minister-te sawifiah chi a ni lo tih sawiin, "Finance minister Pu Zoramthanga ngei hian thil awm dan dik tak sawifiahna White Paper a tichhuak ngei tur a ni. Treasury-te'n kar khat chuang pawisa an pek chhuah theih tawh loh laia Finance Minister-in a la sawifiah duh lo hian a mawhphurhna a lâk thu tak lohzia a tichiang hle," a ti.

CM Zoramthanga’n Mizoram sum dinhmun a sawi ṭhin dan chu nuihpui chi a ni tawh lo tih sawiin Lallianchhunga chuan, "Thinrim nachang kan hriat a hun tawh zawk," a ti a; Mizoram sum dinhmun chhe lutuk siamṭhaa khai chhuak turin sum enkawlna lama mithiam, mi hmingṭha Mizoramin a mamawh thu a sawi.

Sum dinhmun siamṭha tura an ngaihdan zawhna chhángin Dr Lallianchhunga chuan, thil hmanhmawhthlak ni loa sum tam tak senna, Kamrula hnathawh ang chite tihtawp rih te, kum khata cheng nuai 200 chuang senna SEDP board-te ṭhiah te, ṭul loa an duhsak záwngte sorkar hnaa thun tihtawp te, inrenchemna kalpuite a ṭul thu a sawi a ni.

MPCC Media Chairman sawi danin, kum 2008-a Congress an sorkar tirhah a hmaa MNF sorkar sum dinhmun sawngnawi tak zawi zawiin an siamṭha a, kum 2016-17 budget chu state nih hnua surplus budget ṭan kum a ni. June 30, 2016 hnuah RBI aṭanga Ways & Means Advance hmanga sum pûk ngai loin sum dinhmun a ṭha a, kum 2018-a MNF sorkar ṭanah cheng vbc. 700 chuang an hnutchhiah. Surplus budget (revenue surplus) a sàn lai ber kum 2018-19 ah leibá a awm belh lo a, sum pûk belh a awm lo a, hma thar lakna tur cheng vbc. 2,500 chuang a awm.

MNF sorkar hnu 2019-20 aṭangin revenue surplus a tlahniam a; kum 2020-21 ah revenue surplus vbc. 763 nei tura tarlan a nih laiin, sum indaih lohna (deficit) vbc. 799 a awm. Kum 2021-22 ah revenue surplus vbc. 579 awm tura tarlan a nih laiin, vbc. 188.41 deficit leh a ni. Kum 2022-23 ah revenue surplus vbc. 1,419 awm tura tarlan a ni bawk.

Mizoram sorkarin sumah harsatna a tawh nasat avangin PMGSY hnuaia kawng laih mek nasa takin a ṭhuanawp a, December 15, 2021 khan Ministry of Rural Development-a Rural Connectivity Division-in PMGSY hnuaia hnathawh - PMGSY I & II-te chu September 2022-a tàwp tur a ni tih Mizoram sorkar a hriattir.

Sorkar laipui chuan April 22, 2022 khan kum 2022-23 atana PMGSY-a Mizoram hmuh tur chu cheng vbc. 290 a ni tih Mizoram sorkar a hriattir a; vbc. 290 aṭangin first instalment vbc. 70.86 chu July 1, 2022 khan Mizoram sorkar hnenah pek a ni. Sum chu ni 15 chhungin Mizoram State Rural Roads Development Agency hnena pek tur a nih laiin, Mizoram sorkarin a hrènsak tih sawiin Dr Lallianchhunga chuan, sum pe chhuak vat turin sorkar an phût tih a sawi a ni.