Kum 5 chhungin chhungkaw tin mahni kea ding thei tura puih kan tum - Duhoma

ZPM leader Lalduhoma chuan, ZPM party chuan kum 5 chhungin chhungkaw tinte mahni kea ding thei turin puih hi an tum thu a sawi.

Lalduhawma hian July 30, Inrinni khan Khawzawl Kawnzar leh Ngaizawl khuaahte vantlang inkhawmah thu a sawi a, "Pathian leh mipui zara rorelna kan chang a nih chuan kalphung thar, mipui sorkar kan din dawn. Ram leh hnam dinchhuah theih nan thil thar ṭha zawk kan mithiam rualte nen kan duang vek tawh a, kum 5 chhungin chhungkaw tinte mahni kea ding thei tura puih kan tum a ni," a ti.

Mizoramah kut hnathawktute an ding chhuak thei lo a, an rethei telh telh tih sawin Lalduhoma chuan, "Hei hi kan thatchhiat vang te, rem kan hriat loh vangte a ni lo a, kan sorkar hrawn mekin kut hnathawktute leh ram leh hnam hmasawnna aia mahni pumpui an hmangaih zawk vang a ni," a ti a; eirute leh dan bawhchhetute zalen takin tuallaiah an léng a, dan ang taka hma latu turte'n dan an ngaih pawimawh loh avangin sual a pung nasa tih a sawi.

ZPM Leader chuan, Mizorama per capita income tehna ber chu sorkar hnathawkte hlawh a nih thu sawiin, "Kut hnathawktute sum lak luh a mumal loh avang leh a beitham em avangin kan per capita income a sang thei ṭhin lo. ZPM a sorkar chuan kut hnathawktute'n mumal zawka hna kan thawh a, a hralhna hre saa hna kan thawh dawn avangin kan per capita income pawh a sang zel dawn a ni," a ti.

ZPM thuchhuah chuan, July 26-30 chhungin Khawzawl, Chawngtlai, Tualte, Hmuncheng, Khualen leh Ngaizawl khuate Lalduhoma'n a tlawhnaah ZPM-ah mi 281 a lawm lut niin a tarlang.