Mizoram hi ASF-a ti ṭha ber a ni - MNF party

MNF party chuan, vawk pûl hri African Swine Fever (ASF) hmachhawn danah Mizoram chu India rama ti ṭha ber a nia sawiin, AH&Vety minister Dr K Beichhua an chhuan thu an tarlang.

MNF chuan thuchhuah siamin, AH&Vety minister Dr K Beichhua hmalaknain April 16, 2021-ah Lungsen khua leh a chhehvel chu ASF lênna hmunah puan a ni tih sawiin, "Lungsenah hian amah leh Disease Investigation Team rang taka kalin, thil awm dan an enfiah a ni. Kum 2019 aṭang khan khawchhak lamah ASF a lên nasat avangin ram páwn aṭanga vawk lak luh Minister hian a khap tawh a, Zoram hmun hrang hrangah awareness campaign vawi 209 neih a ni tawh," an ti.

Vawk vulhtute remtihna laa vawk suat (culling) a nih thu sawiin MNF chuan, vawk suat neitute zangnadawmna pek tur Rs 10,48,42,200 tihfel a nih tawh thu an sawi a, "Pawisa dawn tur hi AH&Vety department kutah a awm vek tawh a, official level-ah tih tur ṭul zawng zawng tihfel a nih veleh DVO-ah transfer a ni ang," an ti a; pawisa chu zangnadawmna dawng turte account-ah August 15, 2022 hmain thun a nih dawn thu an sawi.

MNF chuan, Covid-19 hripui léng kara vawk vulha eizawngte hmangaitu K Beichhua'n theihtawpin state dang tih ve theih lohah hma a la bik nia sawiin, "Theihtawp a chhuahna avangin Mizoram hi ASF management-ah India ramah ti ṭha ber kan ni. State dangah mumal taka vawk suat a ni ve lo a, Mizoram chauh hi vawk suat compensation dawng tur kan nih avangin Dr K Beichhua kan chhuang tak zet a ni," an ti.

Vawk suat zangnadawmna sum hi Mizoram sorkar leh sorkar laipuiin inzat (50:50)-in an intum sem a ni.

MNF chuan, sorkar laipuia Department of Animal Husbandry and Dairying-in veterinary service awlsam zawka an hmuh theih nan Livestock Health and Disease Control hnuaiah state tin tan mobile veterinary unit (MVU) pek tura a ruahman chu kaihhruainaah chuan ran vulh nuai khat zelah MVU pakhat a ruahman a nih thu an sawi.

Kaihhruaina anga tih ni se, Mizoramin MVU panga pawh a dawng thei lo tih sawiin MNF chuan, "Dr K Beichhua hmalaknain RD Block anga pek turin sorkar laipuiah dil a ni a, pawmpui kan ni. RD block 26 tan MVU phalsak kan ni a, MVU 26 lei nan hian sorkar laipui chuan kum 2021-22 khan cheng nuai 416 a rawn pe a ni," an ti.