July thlaah hripui vei 3,632 hmuh a ni tawh

Mizoramah Covid-19 vei July 29, Zirtawpni khan mi 218 hmuh chhuah a ni a, July 30, Inrinni khan mi 136 hmuh a ni bawk a, July thla chhungin mi 3,632 hmuh a ni tawh. Nimin leh Inrinni khan hripui vei dam tawh mi 181 chhuahtir an ni a, Covid-19 vanga thi an awm lo.

July 29-a Covid-19 positive hmuh chhuah mi 218-te chu mipa 111 leh hmeichhia 107 an ni a; rapid antigen test hmanga hmuh chhuah vek niin, sample endik zat 719 aṭanga positivity rate chu 30.32% a tling.

Inrinnia hripui vei hmuh thar mi 136-te chu mipa leh hmeichhia 68 ve ve an ni a; RAT hmanga hmuh chhuah vek niin, sample endik zat 541 aṭanga positivity rate chu 25.14% a ni.

Nimin khan Covid-19 vei inenkawl zinga mi 44 chhuahtir an ni a, Inrinni khan mi 137 chhuahtir an lo ni tawh bawk.

IDSP record angin, Mizoramah Covid-19 vei 2,32,738 hmuh chhuah a ni tawh a, mipa 1,08,382 leh hmeichhia 1,24,356 an ni a, mipa aiin hmeichhia 15,974-in an tam zawk. Nimin tlai dar 5 thleng khan mi 2,31,060 (99.28%) chhuahtir an ni tawh a, mi 710 (0.31%) thi tawhin, enkawl mek mi 968 (0.41%) an awm.

Kum 2011 chhiarpuia mihring awm zat aṭanga chhûtin, Mizorama hripui vei hmuh tawh zat 2,32,738 chu mi 1,000 zelah Covid-19 positive 212 an awm ang a ni a, mi 1,00,000 zelah hripui vanga thi mi 64 an awm tawh ang a ni.

Nimin tlai dinhmun angin, Mizorama district 11 zingah Covid-19 positive awm lohna district a awm lo a; enkawl lai tamna ber Aizawl district-ah mi 372 an awm a, Lunglei district-ah mi 241 leh Mamit district-ah mi 106 an awm bawk.