YMA Day hlim taka hman a ni

YMA Day vawi 83-na chu nimin khan Mizoram pumah leh state pawna YMA branch awmnaahte hlim taka lawm a ni.

YMA Day-ah hian branch tam zawk chu khua leh veng chhung thian faiin an hnatlang a; branch ṭhenkhatin intihhlimna, infiamna leh intihsiakna hunte an hmang a, zan lama intihhlimna hun leh vantlang inkhawm buatsaih branch eng emaw zat an awm.

YMA branch eng emaw zat chuan mi dangte ṭanpuina hun atan hmangin, veng chhunga khawsak harsa zawkte leh ṭanpui ngaite hnatlangin an pui a; tlai lama YMA Day lawmna ruai ṭheh an awm nual bawk.

Aizawla Bethlehem Veng Branch chuan naupang zawkte'n buhthlei an thiam theih nan section hrang hrangte tan buhthlei intihsiak an buatsaih a, member ṭhahnem tak an tel a ni.

Tuikual South Branch chuan Local Council nen ṭang rualin, June 11, Pathianni zana Rimawia in kâng chu sak ṭhat hnatlang an nei a; in sak ṭhat nan hian bialtu MLA Lalruatkima'n rangva, tile leh hnatlangte ei leh in senso tur sum a tumsak bakah, bialtu councillor R Thanglura leh mimal tlawm­ngaite'n sum an thawm khawm a ni.

Daido Branch chuan YMA Day-ah hian an khuaa chetsualna vanga damdawi-ina awm mek Lalramchhuana lo-ah hlo an thlawhsak a, mi ṭhahnem tak thawk chhuakin, an thlo zo nghal.

Falkawn Branch chuan an khuaa State Referral Hospital-a damlo awm mekte leh damlo awmpuite tan artui an sem. Thenzawl khuaa branch ṭhenkhat chuan Thenzawl damdawi-inah ṭanpuina an pe a, tlaiah damdawi-ina damlo leh thawktute tan chawhmeh an siamsak bawk.

Central YMA hruaitute'n branch hrang hrangah YMA Day an hmanpui a; Mizoram sorkara hotu zingah branch ṭhenkhata hmanpui an awm bawk.

Parliamentary secretary Joseph lalhimpuia chuan a bial chhung, Lunglei Ramthar Veng Branch a hmanpui a; thu sawiin, "Mahni hlâwkna ngaihtuah loa mi dangte tana inpekna hi rawngbawlna ropui ber a ni a, hetiang taka thawk ṭhin YMA hlutna hi hun inher zelin a tidanglam dawn lo a, a hlutna a zual tulh tulh zawk a ni," a ti. Joseph Lalhimpuia hian Ramthar Veng YMA Rûn sakna atan MLA fund aṭangin Rs. 50,000 a pe nghal a ni.

MLA Chalrosanga Ralte chuan Rahsi Veng Branch-te YMA Day lawmna, indoor stadium-ah a hmanpui a; YMA Day lawmpui nan Rahsi Veng Branch hnenah indoor stadium chung tur Dyna Roof leh hna thawktute hlawh tur a pe.

Mizoram State Commission for Women chairpersion Vanlalawmpuii Chawngthu, MLA pawhin a bial chhunga Biate Branch leh Khawlailung Branch-ah a hmanpui. Khaw pahnih­ah hian YMA Day lawmna ruai an ṭheh a ni.