Kawng ping a awm tawh lo

Tun hnaia ruahsûr nasa vanga Mizoram hmun hrang hranga lei min leh chê vanga kawng ṭhenkhat lirthei tlan tlang theih loa awmte chu lirthei kal theiha siam a ni tawh.

PWD chief engineer (Roads) K Lalsawmvela hnen aṭanga Vanglaini thu dawn danin, Tuirial Airfield pêng thlanga NH-64 kawng chhuat tlahniam chu Nilaini khan lirthei kaltlang theiha siam a ni a; a thlang lawka Tuirial lama kawng chhuat tlahniam pawh nimin khan lirthei kal­tlang theiha siam a ni. Kawng tlahniam thlang zawk hi lirthei kaltlang theiha siam ni mah se, lunga hnawh hman a nih loh avangin lirthei an táng zeuh zeuh a ni.

Lunglei leh Lawngtlai inkara kawngpui tlahniam vanga kawng ping pawh a chhak lam ram laih belh a ni a, nimin khan lirthei kaltlang theiha siam a ni tawh. Lirthei lian rit phur tan erawh kaltlang theih a ni em tih finfiah a la ni lo.

Chhingchhip Mual­puia lei (bailey bridge) tla­hniam chu zawm a ngai dawn a, a zawm dan tur PWD-in an ngaihtuah mek. Tun dinhmunah chuan lirthei lian leh lirthei tê pawh rit lutuk phur chung chuan tlan theih a ni lo a, lirthei rit phur lo tan chuan zawh ngam a ni.