CYMA President-in ram leh hnam humhalh kawnga ṭan la turin YMA member-te a sawm
Kumin YMA Day pual hian Central YMA president Lalbiakzuala chuan thuchah siamin, YMA member zawng zawng chibai a bûk a; YMA kumpuan 'Ram leh hnam humhalh’ tihlawhtling tura ṭan la turin YMA member zawng zawng a chah.
CYMA President chuan, YMA-ah sub-headquarters panga, group 47 leh branch 805 a awm tih a sawi a, "YMA member pawh mi 4,04,722 zet kan awm ta a, library nei branch 392, park/reserve nei branch 287, sangha dil nei branch 16 leh sanctuary nei branch paruk lai kan awm a, a lawmawm hle," a ti.
Khawvel inher zelah YMA thil tum leh thuvawnte hre reng chunga inher danglam ve hret hret a nih pawhin YMA zahawmna kengtu ber - Ṭanpui ngaite ṭanpuitu a nihna chu thlauhthla loa vawn nun reng a ngai tih sawiin, "Ṭanpui ngaite ṭanpui tih hi innghahna bera kan hman a ṭul tak zet a ni," a ti a; YMA chu mi lian leh tê, hausa leh retheite ang khata entu, kohhran leh political party inthliarna awm lohna a nih thu a sawi.
YMA chuan ram leh hnam tana thil ṭhaah sorkar finchhuahin a ṭawiawm tur a ni tih a sawi rualin Lalbiakzuala chuan, "Ram leh hnam tana pawi tur leh ṭha loah chuan sorkar pawh ni se, huaisen taka hnial ngam a, kawng dik kawhhmuhtua ṭan a ngai," a ti.
YMA chungah miin rinna an nghah avangin YMA thil tih chu tlo leh belhchian dâwl a nih a ngaih thu sawiin, "Zo nun ze mawi - tlawmngaihna, aia upa zah, rinawmna, thawhrimna leh diknaah innghat se la, YMA hi a ṭhang zel ang. Intodelh kawngah te, ngaihsan tur dik ngaihsan a, ngaihhlut tur zawng ngaihhlut kawngahte ṭan kan lak a pawimawh hle," a ti.
Mizoram hmasawn nan zirna a pawimawh tih sawiin CYMA President chuan, branch tinte chu an huam chhunga naupang sikul kai rual, kai lote dap chhuak a, sikul an kai theih nana hma la turin a chah a; zirlai hlawhtlingte chawimawi uar tur te, sikul thawm ṭhat leh naupangte hnam lâm zirtir leh faina zirtir kawngahte ṭan la turin a chah bawk.
Zofate inpumkhatna atan YMA-in hma a la zel dawn tih sawiin Lalbiakzuala chuan, "A tu-a-mah hi inṭhendarh leh inla hrang zawngin khawsa lo ila. Mizoram leh Zo fate luah chin ramah hian kan zavaiin kan leng vek a, inlungrualna hi kan din chhuahna bulpui a ni tih hriain, inpumkhat takin i khawsa ang u," a ti.
Bru chungchangah, Tripura-a tlanchhiate'n Supreme Court-ah YMA-te dik lo takin an hêk nia sawiin, "YMA hi a tawp thlengin kan dikna hai lan a nih theih nan kan kal zel ang," a ti a; YMA kumpuan 'Ram leh hnam humhalh’ tihlawhtling tura ṭan la turin YMA member zawng zawng a chah.
Central YMA President chuan, YMA chu zu nena sawi rem chi a ni lo tih sawiin, "YMA leh ruihhlo hi sawi kawp chi pawh a ni lo. Kan ṭhalai tam tak suat a, khawtlang leh chhungkaw tam taka harsatna siamtu zu leh ruihhlo laka fihlim hi YMA member-te tihtur a ni," a ti.