Saw Mill Rules buaipui mek a ni

Environment, Forests & Climate Change (EFCC) department chuan, Mizoramah Saw Mill Rules hman thuai a nih theih nan hma a la mek. Saw Mill Rules hi Cabinet pawhin a pawm tawh a ni.

Sorkar thuchhuah tarlan danin, thing zai kaihhnawih dan, Saw Mill Rules chung-changah hian EFCC department hotute chuan June 14, 2017 khan an ṭhukhawm a; June 8, 2017-a Cabinet meeting-in private plantation neitute tana hamṭhatna thlen thei tur Saw Mill Rules-a pawm tâk chu hman thuai a nih theih dan tur an ngaihtuah.

Meeting-ah hian EFCC secretary leh PCCF Lalram Thanga'n EFCC department-a hun rei tak muster roll-a thawk tawh mi 45-te regular appointment order a hlan. Lalram Thanga chuan, EFCC department hlawhtlinna hrang hrangah thawktute hnenah lawmthu sawiin, taima leh rinawm taka nasa zawka thawk turin a ngen.

Chief conservator of forest (Administration) Lalthangliana Murray chuan, Thorang Wildlife Sanctuary zauhna atan khaw pahnih - Kawnpui West leh Darngawn khuaa awm zawng zawng sawn chhuah an ni dawn a, chhungkaw 145 sawn chhuahna tur cheng nuai 1,450 chu sorkar laipuiin a rawn pek tawh thu a sawi a; Dampa Tiger Reserve zauhna turin Serhmun khua sawn chhuah tum mek a ni a, chuta tan chuan sorkar laipuiin sum a pek tawh thu a sawi bawk.

Lalthangliana Murray sawi danin, Climate Change hnuaia Bamboo Project, GIZ, INBAR leh DoNER ministry-te thawhhona tur peih ṭêp a ni a, he project hnuaiah hian chhungkaw 500 thlan tur niin, mau hmanga eizawnna ngêlnghet siamsak a ni ang. Sum mamawhte chu DoNER-in a tum dawn a ni.