Aizawlah zirtirtu indaih lutukah ngai

Mizo Students' Union (MSU) chuan, Aizawl khawpui huam chhunga elementary school an zir chiannaah, zirtirtu an tam hle tih a hmuchhuak niin an tarlang a; chutih laiin, thingtlang lamah zirtirtu an indaih lo hle niin an sawi.

MSU chuan, "Thingtlang lamah zirtirtu indaih lohna nasa tak a awm laia Aizawl sikul ṭhen-khata zirlai naupang awm mang si loa zirtirtu an awm ṭeuh si hi kan hrethiam lo tak zet a ni," an ti a; Mizoram sorkar chu Mizoram hmun hrang hranga zirtirtu indaih lohna sikulah Aizawl leh a chheh-vela zirtirtu ṭhenkhatte chu sawn chhuak turin an ngen a ni.

MSU-in an zir chianna aṭanga an tarlan danin, Aizawl khawpui huam chhunga zirtirtu pakhat-in zirlai naupang a enkawl zat chawhrual chu hetiang hi a ni:

Sorkar primary school-ah Aizawl East huam chhungah zirtirtu pakhatin naupang 10.24 zel enkawl ang a ni a, Aizawl West chhung-ah zirtirtu pakhatin zirlai 11.48 zel leh Aizawl South chhungah zirtirtu pakhatin zirlai 6.56 zel enkawl ang a ni.

Primary school SSA-ah Aizawl East chhungah zirtirtu pakhatin zirlai 14.17 enkawl ang a ni a; Aizawl West chhungah zirtirtu pakhatin zirlai 33.76 enkawl ang niin, Aizawl South-ah chuan 'NIL' tiin an dah thung.

Mizoram sorkar hnuaia middle school-ah chuan, Aizawl East huam chhungah zirtirtu pakhatin zirlai 6.09 zel, Aizawl West chhungah zirtirtu pakhatin zirlai 4.93 zel leh, Aizawl South huam chhungah zirtirtu pakhatin zirlai 5.4 zel enkawl ang a ni. Middle school SSA-ah chuan, Aizawl East chhungah zirtirtu pakhatin zirlai 7.60 zel, Aizawl West chhungah zirtirtu pakhatin zirlai 9.32 zel enkawl ang a ni bawk. Aizawl South chhungah erawh chuan 'NIL' tiin an dah.

A pumpuiah Aizawl huam chhungah Mizoram sorkar P/S-ah zirtirtu pakhatin zirlai 10.36 zel enkawl ang a ni a, SSA P/S-ah zirtirtu pakhatin zirlai 19.22 enkawl ang a ni. Sorkar M/-ah zirtirtu pakhatin zirlai 5.71 zel enkawl ang a ni a, M/S SSA-ah zirtirtu pakhatin zirlai 8.28 enkawl ang a ni bawk.