MLPC Act khauh taka kenkawh a ni - Excise Minister

Excise & Narcotics minister R Lalzirliana chuan, Mizoram Liquor (Prohibition & Control) Act (MLPC Act) kenkawh danah duhkhawp lohna a awm avangin, khauh taka kenkawh a nih tawh thu a sawi.

R Lalzirliana hian nimin khan Congress Bhavan-ah thu sawiin, MLPC Act kenkawh danah mipui lam aṭanga duhkhawp lohna a awm nia hriat a nih thu a sawi a, "Hei vang hian khauh takin tunlai hian kenkawh mek a ni. MLPC Act chu hmanhmawh taka duan ni mah se, dan ṭha tak, sawisel tur a awm lo. Assembly House-ah pawh sawiselna tur awm lo khawpa duan a ni," a ti.

MLPC Act chu hman a nih hnuah a ṭha viau dawna hriat a nih laiin, dan kenkawh khauh tâwk loh avangin sorkarin sawisel a tâwk tih sawiin Lalzirliana chuan, "Hetiang a nih avang hian tunah chuan khauh taka kenkawh a ni tawh," a ti a; dan chhunga awm chhiah lote pawh MLPC Act kenkawhna atan siam thar a nih thu a sawi.

Excise Minister sawi danin, MLPC Act-a awm chiah lo, executive order hmangin wine shop neitute leh a rûka hralhtute lo puitu Excise constable hremna dan te, Excise constable zingah zu a black-a hralh tura lo inhnamhnawih an awm chuan suspend theihnate leh, wineshop neitu dan loa zu hralh hriat chhuah hremna dante siam thar a ni.

Dan loa zu hralh wineshop neitute chu hriat chhuah an nih chuan thla thum chhung an licence hlihsak tur a ni a, vawi hnih man an nih chuan an tihtawpsak tur a ni. Tunah hian wineshop neitu pahnih chu dan loa zu an hralh avangin an licence thla thum chhung atan hlihsak sak mek a ni.

MLPC Act chungchang sawifiahin R Lalzirliana chuan, "He dan hi zu khuahkhirh paha zu in lo thei lo ten zu ṭha zawk, man tlawm zawka an in theih nana tih a ni tih kan hriat reng hi a ṭul," a ti.

Home Minister chuan, tun hnaia ruahsûr nasa avanga Mizoram hmun hrang hranga chhiatna thleng chu sorkarin pawi a tih thu sawiin, "Heng chhiatna hrang hrang tuarte ṭanpui tur hian sorkar chuan a tih theih ang ang a ti ang. Nunna chánte chu rs. 4,00,000 ṭheuha ral an ni ang," a ti a; district hrang hrang DC-te'n an huam chhunga chhiatna thlen dan kimchang an la khawm mek tih a sawi.