Kawng chhia siam ṭhat zel a ni

Tun hnaia ruah sûr vanga Mizoram hmun hrang hranga kawng chhiate chu siam ṭhat zel a ni a; nimin chawhma lam khan Keifang leh Kawlkulh inkarah leimin­in kawng a hnawh a, he thu ziah lai hian lirthei tê kal theia thenfai a ni tawh.

Keifang leh Kawlkulh inkara leimin vang hian hun eng emaw chen lirthei an tangkhang a, theihtawp chhuaha siam a nih hnuah nimin tlai lam khan lirtheite tê chu kaltlangtir a ni. Lirthei lian chi kal theih tura buaipui mek a ni bawk.

Tuirial chhaka hmun pahniha kawng chhuat tlahniam vanga kawng chhia pawh siam ṭhat ni tawh mah se, lei tlak­hniamna thlang zawkah lung dah hman a nih loh avangin lirthei an táng ṭhin a; PWD hotute chuan, lung dah a nih hma chu kawng a diak lo thei lo tih an sawi.

Chhingchhip Mual­puia lei innghahna lei tlahniam chu lirthei lian zawh theih tura siam tum mek a ni a, siam zawh a la ni lo.